Itanagar, Jylliew 20 : Ka National People’s Party (NPP) ha ka sngi Palei, kala lei tai ka jingkyrshan ia ka Sorkar ba ialam da u Pema Khandu na ka bynta ka roi ka par jong ka Arunachal Pradesh bad ban iatreilang kum ka kynhun sha ka jingkiew irat jong ka Jylla.
U President ka NPP ka Jylla bad MLA Thangwang Wangham ula ong “Watla ka NPP kala don lang bad ka BJP hapoh ka NDA, hynrei mynta ka sngi ngi la ai da ka shithi jingkyrshan sha u Myntri Rangbah ka Jylla”.
Kat kum ka jingong u Wangham, ki mat treikam ba hakhmat eh jong ka Sorkar mynta u snem ka long ban phaikhmat sha ki ka bha ka miat ka imlang sahlang.
Da kane ka jingleit kyrshan, u MLA ka Congress Kumar Waii ula sah marwei kum u dkhot ka Liang Pyrshah hapoh ka Iingdorbar Thaw Ain ka Jylla.
Ka NPP ka don 5 ngut ki MLA hapoh ka Iingdorbar Thaw Ain ka Arunachal Pradesh. Ka Party kala iakhun haduh 20 seat ha ka elekshon MLA ba long ha ka 19 tarik Iaiong bad kala jop 5 seat.
Ka BJP kala iakhun ha baroh 60 tylli ki seat bad jop haduh 46 seat kynthup ia 10 ngut kiba la jop khlem ki nongialeh pyrshah.
