Nongstoiñ, Nailar 4: Ka Dorbar Shnong Mawkhlam-Nongpyndeng ka la maham tyngeh, ïa ki riew shim kabu kiba la donkti ban thang dusmon ïa kawei ka Furniture ha shnong kaba la jia ruh mynta la arsien kynthih.
U Secretary ka Dorbar Shnong Mawkhlam Nongpyndeng ha ka kyrwoh, u la ong ba ka Dorbar ka la ïatai sani bha ïa ka jingshah thang jong katei ka furniture kaba dei jong u Bah Donboklang Syiem.
Ka shnong ka la maham tyngeh ïa ki riew shim kabu la ki dei ki riew shimet, ne kiba shim kabu ha ka kyrteng jong ki kynja Seng (NGOs), ne la ki dei kino kino Seng kiba leh ïa kiba kum kine ki kam, ba lada ka Dorbar Shnong ka lap, kan kem bad pynshitom da kaba tyngeh.
U la ong ba kiba kum kine ki jingleh riew khlaw, ki la sdang roi ha ka shnong bad kiba kum kine ki jingjia kin ktah shibun ïa ki khun samla kiba dang sdang ban seng ïa la ki jong ki kam bad kiba la sdang ban kiew irat ha ka kam jong ki.
Ka Dorbar Shnong Mawkhlam Nongpyndeng ka ïawer bad kyntu ïa baroh ki para nongshong shnong ka thaiñ, ban ïa kyndit bynriew bad ban nym aili ïa kiba kum kine ki jingjia nangne shakhmat.
Ka shnong ka pyntip ruh ba ïa kane ka jaka shna jingshna, la dep ai jingbit da ka Dorbar Shnong hadien ba la bishar bnïah ïa ki kot ki sla jong ki nongtrei hangne, kiba dei ki bar jylla bad kiba la dep register ïa lade hapoh ka tnad Labour Department, jong ka Sorkar Meghalaya.
