Nongstoiñ, Naiwieng 7: Ka jingïalehkai Invitation Knockout Football Tournament 2022-23 jong ka New Nongstoiñ Sports Socïal and Cultural Club, ka la bteng biang hynne ka sngi ha madan New Nongstoiñ, ha kaba ka MLP FT na nongbah Shillong ka la hiar madan bad kheit ïa ka nam jop da ar kol la nod pyrshah ïa ka Golden Lion Rymbai.
Ha kane ka jingïalehkai kaba ar jong ka lympung kaba la sakhi da ki hajar ngut ki paidbah ka sor Nongstoiñ, la sakhi ïa ka sur ïalehkai kaba mar katjuh bor hapdeng ki arliang mamla. Hynrei, ka jingïapher ka long ba ym shym la don satia kita ki snar thep kol kiba tbit.
Hapdeng ka jingïakhun ka MLP FT lyngba ki katto katne ki kabu ba paka ba ka la ïoh, khlem pynlehnohei ka la pynurlong ha ka kylla miet lyngba u Vikram Chetri ha ka minit kaba 61 bad na u Pynshailang Lyngkhoi ha ka minit kaba 71.
Na ka liang ka Golden Lion hadien ka jingshah thep kol, ka la pyrshang ban sei ki buit ki sap katba don ban ïoh pynphai, hynrei tad haduh ka minit kaba khatduh jong ka jingïalehkai kam shym la lah satia ban pynphai wat tang kawei ruh. Kumta ha kaba kut ka MLP FT ka la jop noh da ar kol bad jam syndon ïalade sha ka quarter final jong kane ka lympung phutbol ba mynta.
Ka khusnam rang ïalehkai ba kynsai ha kane ka janmiet ha madan New Nongstoiñ, ka leit sha u Vikram Chetri jong ka MLP. Ka jingïalehkai kaba lai jong ka pre quarter final kan long ha ka 15 tarik mynta u bnai hapdeng ka Mawlai FC Shillong ka ban ïakhun pyrshah ïa ka PSA Guwahati.
