Shillong, Iaiong 12 : Ka Harijan Panchayat Committee (HPC) hynne ka sngi Balang, kala pynpaw ba kala ap ia ka Sorkar Jylla ban khot ia ka jingialang na ka bynta ban iakren ia ka kam ba iadei bad ka jingpynkynriah ia ka Them Metor na Them Iew Mawlong.
“Ngi dang ap ia ka Sorkar ba kan khot ia ngi sha ka jingialang” ong u Gurjit Singh, Secretary ka HPC hynrei ula kyntait pat ban iathuh la ka Committee kan aiti ne em ia ka jubab halor ka jingtyrwa jong ka Sorkar.
Ha kajuh ka por, u Symbud Myntri Rangbah Bah Prestone Tynsong u pyntip ba ka Sorkar kan sa buh noh shen ia ka tarik ban shong jingialang bad ka HPC ha ka ban pynsngewthuh kham bha ia ki halor ki nongrim jong ka Sorkar bad ban sdang ia kaei kaba ka don ban pynsngew halor kane ka kam.
“Ngi dang ap ia ka jingwanphai u Symbud Myntri Rangbah ba khmih ia ka kam pynroi sor naba ngi kwah ban pynlong ia ka jingialang bad ka HPC hapoh une u bnai ba mynta” ula bynrap.
U Bah Prestone ula pynpaw ba um don satia ia ka jingtip la ka HPC kala phah ktien ne sha ka Tnad pynroi sor haba iadei bad ka jubab halor ka jingtyrwa ka Sorkar.
Ha ka 16tarik Lber, ka Sorkar kala buh ia ka 10 tarik Iaiong kum ka sngi ba khatduh ba ka HPC kan ai jubab ia ka jingtyrwa ban pynkynriah ia ka Them Metor na Them Iew Mawlong sha ka jaka jong ka Shillong Municipal Board (SMB).
Ka Sorkar kala kyntait ruh ia ka jingtyrwa jong ka HPC ban aipor sa lai bnai ia ka Committee ba kan jubab ia ka jingtyrwa ka Sorkar.
Ia kane ka rai la shim ruh hadien ka hukum jong ka IIngkashari Meghalaya High Court ba 16 tarik Rymphang, kaba bthah ia ka Sorkar ban pynbeit noh mardor ia ka kam hashuwa ka elekshon MLA.
Ha ka 19 tarik Nailur 2022, ka Sorkar kala aiti ia ka blueprint sha ka HPC ha ka jingialang iashong, kaba pynpaw ia ka rai ban shna ia ki flat ba bun mala ha ka jaka ba don ki quarter ka SMB na ka bynta ban pynkynriah ia ki 342 tylli ki Longiing na Them Metor.
Ka Sorkar kala kyntait ruh ia ka jingtywa jong ka HPC ba 25 tarik Iaiong 2022, kaba pan haduh 200 square meter ka jaka sha kawei pa kawei ka Longiing jong ki 342 ngut hapoh ka European Ward nalor ban pynlut ruh ia ka jingshna ia ki Iing.
