Shillong, Risaw 26 : U Symbud Myntri Rangbah ka Jylla ba khmih ia ka tnad Home (Police) Bah Prestone Tynsong ha ka sngi Palei, ula pyntip ba ka Sorkar Jylla ka dang ap ia ka jingtyrwa na ka Police Headquarter ban pynkha ia ka Police Commissionerate.
Haba iakren bad ki nongthoh khubor, u Bah Prestone ula ong “Ngi la dep bthah ia ka Tnad MLP bad ia u DGP ba kin pyn khreh lut ia baroh ki jingdonkam bad ban phah ia ka jingtyrwa sha ka Sorkar. Mynta ngi dang ap ia kane”.
Ula ong ba ka kam ba iadei bad ka jingthungkam thymmai ia ki Pulit ruh kala jan dep mynta. Hynrei, ki don pat katto katne ki jingeh namar ki katto katne ki jingkylla kiba donkam ban leh ha ka rule jong ka Recruitment Board.
“Haba kut, nga hap ban rah sha ka jingialang jong ka Kynhun Myntri bad nga kyrmen ba ka Kynhun Myntri kan ai jingmynjur ia ki jingpynkylla ha ka rule. Shisien ba ngi la dep ia kane, ngin sa pynmih ia ka jingpynbna bad ngin sa pyndep noh ia ka jingthungkam pulit” ula ong.
Kat kum ka jingong jong u, ka jingthungkam pule ban sa long kan kot ym duna ia ka 2500 ngut.
