Shillong, Lber 04: U Myntri ka Tnad Pule Puthi Rakkam A Sangma ha ka sngi Ba-ar, ula pyntip ha Iingdorbar ba ka Sorkar ka dang ap ia ka jingmynjur jong ka All India Council for Technical Education (AICTE) ban pynsdang ia ka jingshim klas jong ka Shillong Government College of Engineering (SGCE), kaba don ha Mawlai Kynton Massar.
Haba jubab ha ka kynta kylli jingkylli, u Rakkam ula pyntip ba ka SGCE kala aplai ha ka 26 tarik Nohprah 2024 ban ioh ia ka jingmynjur ka AICTE na ka bynta ban sdang ia artylli ki technical course-ka Civil Engineering bad ka Electrical Engineering.
Hadien kane, ka AICTE kala pynlong ia artylli ki jingialang bishar ia ki kot ki sla kaba la long ha ka 22 tarik Kyllalyngkot, 2025 bad ha ka 4 tarik Rymphang 2025.
“Ki stad ki jhad na ka AICTE kila ai jingmut ba ki bor pyniaid ka College ki dei ban pynbiang ia ki katto katne ki jingtei ba dang duna ia kiba la shimkhia mynta” ula bynrap.
U Rakkam u pyntip ba ka jingtei ia ka building ba kynthup ia ka Academic Block, Administrative Block bad ka hostel ki shynrang bad kynthei jong ka SGCE ka dei kaba la dep ban pyntrei bad la plie ruh ia ka da u Myntri Rangbah Conrad K Sangma ha ka 16 tarik Kyllalyngkot, 2023.
Nalor kane, ia ka jingpynpoi um, ring bording bad kiwei kiwei ha SGCE ruh kila biang lut nadong hadong.
U pyntip ba ka Sorkar kala phah ktien ia ka jingmynjur ban seng ia ka SGCE bad kala mang ruh haduh 55 tylli ki kam. Kala shah ruh ia u Additional Director Polytechnic & Shillong Engineering College ba un bat lang ia ka kam kum u Principal ka SGCE.
“Ka Sorkar kala mynjur ruh ban thung ia 13 ngut ki nonghikai ka Shillong Polytechnic kiba biang ka kyrdan ba kin hikai hapoh ka Engineering College” ong u Rakkam haba pyntip ba ka North Eastern Hill University (NEHU_ kala ai ka jingmynjur ia ka jingpyniasoh jong ka SGCE na ka bynta lai snem.
“Kumta, ynda ngi la ioh ia ka jingbit na ka AICTE, ngin sa sdang noh ia ka jingshim klas kham kloi kat kaba lah” ula kular.
 ban pynsdang ia ka jingshim klas jong ka Shillong Government College of Engineering (SGCE), kaba don ha Mawlai Kynton Massar.){kind=link}