Shillong Nailar 19: Ka Myntri ka Koit Khiah ka Kong Ampareen Lyngdoh kala pynpaw ia ka jingskhem jingmut halor ka jingiaid shakhmat jong ka Shillong Medical College, haba pynpaw ba kane jaka pule ka dang ap mynta sa ia ka Letter of Permission (LOP) na ka Medical Council of India (MCI).
Katkum ka jingong ka jongka, ka tnad kala trei shitom bha bad u Myntri Rangbah ula ai ia ka jingkyrshan ba pura ia kane ka jaka pule.
Haba iakren bad ki nongpathai khubor ha ka sngi Baar, ka Kong Ampareen Lyngdoh kala ong ba ka LOP ka dei ka kam ba shabar u pud u sam jong ka sorkar jylla ban ong eiei, hynrei ka skhem jingmut ba ka college kala long kaba la pynkhreh ban sdang noh ia ka samoi pule.
Ka Director jong ka Medical College kala wan ban shimti ia ka kam bad kala pyllait ia ka kyrdan kaba kala bat ha RIMS Imphal.
Ka Myntri kala pynbna ba ka jingiasyllok na ka bynta ki seat jong ka MBBS yn sa pynbna paidbah noh shen.
“Lada phi kylli ianga, hato ngi lah long kiba la pynkhreh, ngan ong hooid. Ka director kala shimti ia ka kam bad kala dep ban ioh ia ka jingpyllait na ka kam kaba ka bat ha ka jaka pule kaba mynshwa ha RIMS Imphal bad nga don ia ka jingmut kaba skhem ba ka dei ban urlong, ngi don haduh ka taiew kaba khatduh jong u Nailur ban pyrkhat ia kane hynrei ha kajuh ka por, hooid ka jingiasyllok halor ka seat MBBS yn sa pynbna noh shen” la ong ka Kong Lyngdoh.
Watla kam shim la batai shai ia ka jingdon thikna jong ki seat kiba la bhah na ka bynta ka sorkar Meghalaya, hynrei kala pynpaw ia ka jingskhem jingmut ba ka nombar kan long kaba iasyriem kum ka jingbhah ha u snem ba la dep kaba long kumba 96 ne 110 seat.
Ha kaba iadei bad ka jingthungkam ia ki nonghikai, ka kong Lyngdoh kala ong ba ka college kala don hapdeng ka jingduna ha ka jingdon ki nonghikai, hynrei kala don pat ka jingiaid shakhmat.
Kala ong, ba kala don ka jingpynbna paidbah ne Advertisement na ka bynta ki kyrdan jong ki nonghikai bad ka college kala jan ha kaban pyndap ia ka jingdonkam ia ka nombor jong ki nonghikai.
Ka Myntri kala pynpaw ba ki don ki medical college kila sdang da ka jingdon tang khyndiat ngut ki nonghikai bad ka kyrmen skhem ba ka Shillong Medical College kan sa ioh ban sdang noh shen.
Ka Myntri kala kdew ruh ba ka por kaba khatduh (Deadline) ban pyndep ia ki jingpynkhreh baroh kadei hapoh ka taiew ba khatduh jong u Nailur.
 na ka Medical Council of India (MCI).){kind=link}