Shillong, Risaw 29: U MLA ka Pynthorumkhrah konstitwensi u badei ruh dkhot ka National Executive Committee jong ka Bharatiya Janata Party (BJP) Bah A.L Hek ula kam ba ki nongïalam ka party na Delhi kin shim ïa ka rai, lano ka BJP kan weng noh na ka sorkar synroplang ka Meghalaya Democratic Alliance (MDA) ba la ïalam da ka National People’s Party (NPP).
Ha ba kren sha ki lad pathai khubor u bah Hek u la ong ba ki nongïalam ka BJP na Delhi ki dang pyrkhat bad lada ka por ka la biang kin sa shim ïa ka rai lada donkam ban weng ne iai neh beit bad ka sorkar MDA.
“Ki nongïalam na Delhi kim shym la shong kli kti bad ki dang iai bishar haba iadei bad ka jingdon ka BJP bad ka sorkar MDA bad ka por hi kan sa batai lano yn mih noh kane ka sorkar synroplang” la ong u bah Hek.
Lah ban kdew ba National Vice-president ka BJP uba peit pyrman ïa ka jylla Meghalaya u M. Chuba Ao ha ka 3 tarik Nailur 2022 ula ong ba ka BJP kan sa weng noh na ka MDA bad ula kob ruh ba ka BJP kan sa wanlam ïa ka Enforcement Directorate (ED) bad ka Central Bureau of Investigation (CBI) ban tohkit halor ka bamsap ba shyrkhei ha ka jylla Meghalaya.
