Tura, Rymphang 17 : U Myntri kam Pohiing ka Ri Amit Shah, ula ong ba lada ka Bharatiya Janata Party (BJP) ka wan ha ka bor ban thaw sorkar ha Meghalaya, kan pynthikna ba u Judge bala shongthait ka Iingkashari Supreme Court, un tohkit lut ia baroh ki jingkynnoh bamsap pyrshah ia ka sorkar MDA ba ialam da ka NPP. U Amit Shah ula kren ia kane ha ka rynsan ialap elekshon jong ka BJP ba long ha Dalu hynnin ka sngi thohdieng, kaba la wan iashimbynta ruh da ki hajar ngut ki paidbah.
Katba u dang kren ia ka jingtohkit ban sa pynlong bad niew ia ka Sorkar MDA kum ka Sorkar ba bamsap tam, u Amut Shah ula sangap jar pat ia ka kynhun synrop jong ka sorkar MDA kaba ka BJP ruh ka don bynta lang.
U MLA ka BJP na Pynthorumkhrah Bah A.L.Hek ula bat kum u Myntri ka Tnad ka Koit ka Khiah palat ia lai snem bad la bujli ia u da u MLA ka BJP na South Shillong Bah Sanbor Shullai haduh ba kut ka samoi.
Haba kren biang ia kijuh ki kyntien ha Tura haba khein ia ka Meghalaya kum kawei na ki Jylla ba bamsap duh hapoh ka Ri, ula kular ba ka Sorkar kala thung ia ka Judicial Inquiry halor ki jingkynnoh bamsap ka ban sa khlieh da u Judge bala shong thait ka IIngkashari Supreme Court.
Haba khein ia ka Sorkar MDA kum u ‘Transformer bala sniew” ba donkam ban bujli da uba thymmai, u Shah ula wer ia ki paidbah ban vote noh ia ka BJP ka ban pynthikna ia ka jingkiew shaphrang jong ka Jylla.
“Ka Sorkar BJP kan pynthikna ba ki skhim kin poi sha ki paidbah bad ki longiing baduk jong ka imlang sahlang kin ioh ia ki marbam bas am ei, ki iing ba duk, ki jingmyntoi ha ka koit ka khiah, ki jingpynioh tyndong lyer shet jingshet bad wat ki painkhana” ula ong.
U Myntri Rangbah ka Assam Himanta Biswa Sarma uba la synran ia u Amit Shah sha ka Rally ha Dalu, ula kular ia ki paidbah ba ka BJP kan pyntreikam lang ia ka ‘Orunodoi Scheme” jong ha Assam hangne ha Meghaaya ha kaba ki kynthei kin ioh ia ki jingiarap pisa lyngba ka direct benefit transfer.
Ha Assam, hapoh ka Orunodoi scheme, ki kyntheo kila ioh mar T 1000 ha ka sngi ba nyngkong jong manla u bnai bad ia kane ka skhim la pyllait paidbah naduh u bnai Risaw 2020.
Ka Sorkar MDA ruh kala pyllait paidbah ia kum kane ka juh ka skhim bala pyntreikam hapoh ka Jylla ia kaba la tip kum ka FOCUS bad FOCSU+ katba ka Trinamool Congress kala kular ban ai song jingiarap sha ki kynthei hapoh ka WE Card lada ka wan ha ka bor.
