Shillong, Naiwieng 15: Hadien ka jingkhlad noh ka Longkmie kaba lashah tynrah ha ka thuk thuk ha Mawlai Mawdatbaki, u Superintendent of Police (Traffic) ka East Khasi Hills District, u Kamakhya Prasad, ula ong ba u nongniah ia ka thuk thuk u dei uba dang khynnah bad dangrit ha ka rta bad lada hap ban pynshitom, ki kmie ki kpa ruh kin shah pynshitom kat kum ki kyndon jong ka aiñ.
Haba iakren bad ki nongthoh khubor, u Prasad ula ong ba ki Pulit kila pynlong ia ka jingtohkit bad ha ka jingtohkit la shem ba u nongniah udei uba dang khynnah bad u dang ioh tang ia ka Learner License.
U SP ula pynpaw ba ka jingniah marwei ia ka thuk thuk da ka Learner’s License bad ban niah ia ka thuk thuk kaba palat ia ka 55cc la khein ba kadei ka jingpynkhein ia ka aiñ. Lada lap, u nongniah yn mad ia ka jingshah pynshitom ne ki kmie ki kpa ruh kin hap ban mad ha ka jingshah pynngat ha ki kyndon ain.
“Ha ka jingtohkit kaba nyngkong la shem ba u nongniah udei uba dang khynnah bad uba dang rit ha ka rta bad u don ia ka Learner License. Ula pynkhein ia ki jingbthah bad ki kyndon jong ka Learner License, katkum ki kyndon aiñ uba bat ia ka Learner License lada u niah, u lah ban niah ia ka ar shaka kaba don ne bym don Gear tangba kam dei ban palat iaka 50cc bad lada niah ha ki jaka paidbah kadei ban dei lyngba ka jingioh jingbit na ki kmie ki kpa” ong u SP.
U SP ula iathuh ba une u nongniah uba dang khynnah uba la donkti ha ka jingjia ha aksiden ha Mawlai la dep ban kem bad la rah ruh ia u sha iingkashari bad la rejistar kes pyrshah ia u.
U SP ula ong namar ba une u nongniah uba dang khynnah ula pynkhein ia ki kyndon ain kumta ki pulit kin sa khmih bniah bad lada donkam yn sa pynshitom ruh ia ki kmie ki kpa jong une u khynnah, kiba la ailad ia une u khynnah ban pyndonkam ia ka thuk thuk kaba palat iaka 50cc.
“Kat kum ki kyndon, ki kmie ki kpa ki hap ban ai jingbit bad ban shim ia ka jingkitkhlieh lada u nongniah uba dang ioh iaka Learner License u niah ia kaba don gear bad lada jia eiei kin hap ban shim ia ka jingkitkhlieh” ong u SP.
Ula iathuh ba ki Traffic Police kila peitngor bha bad kino kino kiba pynkhein ia ki kyndon kin shah pynshitom katkum ki kyndon ain.
Ula kyntu ruh ia ki kmie ki kpa ba kidei ban long kiba phikir haba ki thied ia ki thuk thuk na ka bynta ki khun jong ki namar ka lah ban don jingma lada ki niah khlem akor ia ka thuk thuk bad lada shem ba ki kmie ki kpa ki pynkhein ia ka aiñ, ia ki ruh yn pynshitom lang.
“Watla ka Shillong Traffic Police kala trei shitom ban tehlakam ia kane ka jingniah khlem akor, hynrei kadei ruh ka kamram jong ki kmie ki kpa ban peit ba ki khun jong ki kim dei ban pynkhein ia ki kyndon bad ki jingbthah. Lada lap ba ki pynkhein ia ki kyndon ain, ki kmie ki kpa kin shah pynngat lang bad ki pulit kin pynngat ia ki katkum ki kyndon aiñ” ong u SP.
