Shillong, Nohprah 04: U Myntri Rangbah ka jylla u Conrad K Sangma hynne ka sngi Balang ula buh ia u mawnongrim ban tei ia ka Shillong Ropeway Project, ia kaba la dep ban buh mawnongrim da ka President ka ri India ka Droupadi Murmu ha ka 16 tarik u Kyllalyngkot mynta u snem, ha ka jingdonlang u Myntri ka kam Jngohkai u Bah Paul Lyngdoh.
Ia katei ka Plaque kaba pyni ia ka jingbuh ia u maw nongrim la plie paidbah ha ka jaka ban tei ia ka projek ha Shillong Peak View Point.
Ha katei ka jingialang u Myntri Rangbah bad u Myntri ka kam jngohkai kila aiti ia ka “Letter of Acceptance” ne ka shithi jong ka jingpdiang, sha ka KEC International Limited – Tantia Construction Limited JV kaban sdang ia katei ka jingtei ia ka projek kaba kongsan ha ka jinglut jingsep kaban kot T. 175 Klur.
Kane kan dei kaba nyngkong eh ha ka jylla Meghalaya ban don ia ka Ropeway kaban kit ia ki nongleit nongwan, ia kaba yn pyntrei da ka jingiatreilang bad ka kompani kaba na ka ri France ka POMA bad ka kamram jong kane ka kompani ka long ban pynbiang ia ki tiar ki tar bad ia ki kor ki bor na ka bynta katei ka projek.
Ka sorkar jylla kala thaw ia ki lad ki lynti ban tei ia ki jingtei kiba bun ban kyntiew ia ka kam jngohkai bad ka ropeway project kadei kawei na kitei ki bynta.
U Myntri Rangbah ka jylla u Conrad K Sangma ula aiti ruh ia ka pisa T.1.5 Klur ha ka wat ka baar sha u Bah Glanding Lyngdoh u General Secretary jong ka Riat Laban Dorban Pyllun, kaba long shi bynta jong ka jingai ia ka T.3 Klur na ka bynta ban siew ia ka bai jaka.
Haba kren ha ka jingialang, u Myntri Rangbah ula iaroh ia baroh kiba donbynta ha ka kam ban pyndep ia ki jingthoh jingtar bad ia baroh ki jingdonkam ban ioh sdang noh ia katei ka projek.
“Kila don bun ki jingeh kiba la iakynduh naduh ka jingshim ia ka jaka, ka jingioh jingbit ban ban thaw ia ka Meghalaya Ropeway Development Authority ban pynthikna ia ka kyrdan jongka jingshngain bad ka jingai lisen. Ka jingsdang ia ka projek kala seisoh hadien ba kala don ka jingpynkhreh kaba la shim por haduh 4 snem” ula ong.
Ula pynpaw ruh ia ka jingsngewnguh ia ka Raid Laban Dorbar Shnong Pyllun kaba la ai iaka jingiatreilang. Kane ka projek kan iaid lyngba ka Laban, Madan Laban, Upper Lumparing, Lower Lumparing, Lumkjatsngi, Oxford Hills bad Rngi Shillong.
Haba kren shaphang ka jingiatreilang jong ki paidbah ha katei ka projek, u Myntri Rangbah ula ong, “Ka long kaba kongsan bha ba ki paidbah kin iatreilang bad ka sorkar. Ka projek kala mih kadei na ka jingiatreilang hapdeng baroh kiba iadobynta lang. Kane ka projek kan pynthikna ia ka jingioh lum ia ka khajna, kaba ai jingmyntoi ia ka Dorbar bad kiwei kiwei kiba iadonbynta ha ka projek,”.
U Myntri Rangbah ula iaroh ruh ia ki bor shipai khamtam ia ka Air Force kaba la ai ia ka jingiatreilang bad jingkyrshan ban sdang ia katei ka projek.
Ula pyntip ba ka sorkar ka dang thaw ia kiwei pat ki lynti ban pynïasoh bad ka jaka jngohkai bad ban pynduna ïa ka jingkhapngiah ha ka jaka hiar jong ka Ropeway ha Madan Laban.
Ula pyntip ruh ba ka sorkar kan sa shna da kawei pat ka lynti kaba jrong kumba 4 km kaban pyniasoh bad ka surok kaba don ha 101 Area, Upper Shillong.
“Ka Ropeway kadei ka lad kaba biang bha ha ka leit ka wan ha ka jaka sor bad kan long ruh kum ka lad ban pynduna ia ka jingkhapngiah ia ka nongbah” ula ong.
Kiwei kiwei kiba la iashimbynta lang ha katei ka jingialang ki kynthup ia u Chairman jongka Meghalaya Tourism Development Corporation u Bah Sanbor Shullai, u Chief Secretary ka jylla u Bah D. P. Wahlang, u Commissioner & Secretary ka tnad Jngohkai u Dr. Vijay Kumar D, u Director ka tnad Jngohkai u Bah Cyril V.D. Diengdoh.
