Nongpoh, Rymphang 28: U MLA ka Umroi Constituency u Bah Damanbait Lamare, hynne ka sngi Saitjaiñ ula aiti ia kawei ka iingsah kaba la pynshna kyrpang na bynta kawei ka longiing kiba shong basah ha ka shnong Kalapangti hapoh ka Umroi constituency.
Ym tang ba la pynshna ia kane ka iingsah kaba 6 kamra, hynrei la lah ban pyndep syndon ruh ia ka jingtan bording, ka jaka leit shabar kaba paka ia kaba la aiti syndon ia ka Kong N Lyngdoh bad u Bah E Mukhim kiba don ruh shiphew ngut ki khun.
La wan ban sakhi lang ruh ha kane ka sngi ba la aiti ia kane ka iingsah da u Bah S. Pakyntein Incharge ka Khapmara PIC, u Bah T. Rynjah Rangbah Shnong ka Kalapangti, u Bah Pynskhemlang Sun President ka NPP Raid Madan Kyrdem nalor kiwei kiwei ki riew rangbah.
Haba kren ha kane ka sngi, u Bah Damanbait Lamare ula pynpaw ia ka jingkmen ban ioh ban aiti noh ia kane ka iingsah kaba la pynshna kyrpang na bynta kane ka longiing kaba mad ia ka jingeh bad jingjynjar, ha kaba ula ong ruh, ba kum u MLA um dei u ba peit tang na bynta ki kam pynroi ne kiwei kiwei hynrei kum u nongmihkhmat u hap phaikhmat ruh sha kito ki longiing kiba mad jingeh bad jingjynjar.
U la pynpaw ruh, ba kane ka jingleh isynei ia kito ki longiing kiba donkam shisha ki jingiarap, la btin lynti naduh u kpa jongu u Bah Ngaitlang Dhar naduh ba u dang long kum u MLA bad ruh ka nuksa jong u Ma Sniawbhalang Dhar kiba ju hikai kumno ban phaikhmat sha ki longiing kiba shem jingjynjar.
Na ka liang kane ka longiing, kala pynpaw ia ka jingsngewnguh kaba khraw halor ka jingiohi jngai jong u nongmihkhmat jongki, uba la kloi ban pynioh lem ia ki, da ka iingsah kaba paka da kaba kitbok kitrwiang ruh ia u kum u nongmihkhmat ba un nang lah ban bteng ia ki kam shakri paidbah kiba janai na kawei ka por sha kawei pat.
