Mizoram, Kyllalyngkot 15: U District Magistrate ka Champai James Lalrinchhana ula aiti ia ka kaiphod jingtohkit halor ka jingther bomb jong ki shipai Myanmar hajan khappud ka Ri India sha ka Tnad Kam Pohiing ka Jylla Mizoram.
U James Lalrinchhana ula pyntip ba ia kane ka kaiphod la aiti sha ka tnad Kam Pohiing haka sngi Thohdieng jong ka taiew bala dep.
Kat kum ka khubor, ki liengsuin jong ki shipai Myanmar kila hiar thma ia ka ktem “Camp Victoria” jong ka Chin National Front (CNF) ha kaba san ngut ki kaikhlaw kila iap.
Katkum ki tyllong khubor bala iohlum, la iathuh ba ki lyngkot lyngkhai jong ka jingbthei la lap na ka thaiñ Tiau ha ka por jong ka jingtohkit, ia kaba la dep ban kdew haka kaiphod bala aiti sha ka sorkar Mizoram.
Ka Young Mizo Association (YMA) kala pynrem jur ia kane ka jingjia bad kyrpad ia ka Sorkar India ban leh da kaba tyngeh ia ka Myanmar namar ka jingwan rung shapoh u pud ka Ri India. Hynrei, ki shipai ka Ri India kila kyntait ia kane ka jingther bomb shapoh ki jaka ka Ri India.
