Shillong, Jymmang 07 : U Myntri Rangbah ka Jylla Conrad K Sangma, hynne ka sngi Balang, ula aiti ia ka instalment ba nyngkong jong ka song jingkyrshan pisa ba T. 1 klur sha ka Nazareth Hospital, Shillong, hapoh ka Meghalaya Health Advancement Policy (MHAP).
Ka Meghalaya Health Advancement Policy (MHAP) ka dei ka policy ba dang shu pyllait ha ka 5 tarik Jymmang da u Myntri Rangbah, ban kyrshan pisa ia ki hospital ba pyniaid da ki missionary bad seng trei mon sngewbha (non-profitting hospital), ba kin lah ban pynjanai ia ka rukom ai jingsumar ia ki paid nongshongshnong khamtam kiba wan na ki longiing kiba duna ka ioh ka kot.
Kat kum kane ka Policy, ka Sorkar Jylla kan ai jingkyrshan pisa ba mar T. 2 klur sha ki hospital ba shakri khlem jingiohnong, kiba long baroh haduh 5 tylli ki hospital, kiba don ha Ri-lum Khasi, Jaintia bad Garo. Kine ki hospital kin hap ban aiti ia k Utilization Certificate ban ioh pat ia ka instalment kaba ar.
Hynne ka sngi, u Myntri Rangbah ula aiti ia ka cheque ba T. 1 klur sha ki bor pyniaid jong ka Nazareth Hospital, Shillong.
Haba kren ha ka jingialang, u Myntri Rangbah ula ong ba ka Sorkar kala kut jingmut bad phaikhmat bha halor ki kam ban kyntiew ia ki lad ai jingsumar wat hapdeng shibun ki jingtynjuh kiba don ha kane ka kam.
“Ka Meghalaya ka don ia ka bhah mang tyngka bah eh duh ha ka koit ka khiah haba ianujor bad kiwei pat ki Jylla hapoh ka Ri bad bun na kane ka mang tyngka ka dei kaba la mang ban tei pynbha ia ki jingtei” ula ong.
“Ka thong jong ngi hi haba khatduh ka dei kajuh bad kata ka long ban ai ia ka jingsumar kaba bha, kaba thikna bad kaba lah ban kot bor sha ki paidbah bad hangne ngi lah ban iatreilang bad ki hospital bapher bapher” ula ong haba pyntip bad batai ia ka jingpynwandur ia ka Meghalaya Health Advancement Policy.
Haba pynpaw ia ka jingsngewnguh ia ki briew kiba shakri ha ka liang ka koit ka khiah, ula kyntu ia ki ba kin iai bteng ban ai ka jingshakri da ka jingsngewtynnad ia ka kam, ka jingaiti bad ka jingsngewrit.
Ula ban jur ruh ia ka jingdonkam ki hospital ban iakren iakhana hapdeng jong ki ym tang ban pynjanai ia ka rukom ai jing sumar hynrei ban lah pynurlong ruh ia ka jingiatreilang hapdeng ki doktor.
Ka Administrator, Nazareth Hospital, Shillong, Sr Noreen, kala pynpaw ia ka jingsngewnguh ia kane ka jingkyrshan pisa bad iathuh ruh ia ki jingdonkam kiba ka hospital kan pyndonkam ia kane ka pisa khamtam ha aban thied ia ki tiar iada ia ki jingim (lifesaving) bad ki Ventilators na ka bynta ka Emergency Trouma Unit, Maternity Care bad ka Neonatal Intensive Care Unit bad ruh ban pyndonkam na ka bynta ka college ki nurse ka ban sa wan, ka ban shim klas haduh 100 ngut ki samla pule ha ka shisnem.
Kiba la iadonlang ha kane ka jingaiti ia ka cheque ki kynthup ia u Commissioner & Secretary, Dr Joram Beda, National Health Mission, Mission Director, Ramakrishna Chitturi, Auxiliary Bishop ka Shillong, Fr Bernard Laloo bad Vicar General, Fr Richard M Majaw.
