Shillong, Naiwieng 18: U Myntri Rangbah ka jylla u Conrad K. Sangma hynne ka sngi Nyngkong, ula aiti ia ka cheque ba T.6,07,336 sha u Dr. H.H. Mohrmen, Secretary ka Society for Urban and Rural Empowerment (SURE), ha Chief Minister’s Office, Shillong.
Katei ka pisa kadei na ka bynta ban thied ia ki kali na ka bynta ka Halfway Home, Jowai, kaba don ha Sabahmuswang, West Jaintia Hills. Ia katei ka pisa la noh synniang da u Myntri Rangbah lyngba ka Chief Minister’s Special Development Fund 2024-25 (NGO Category).
Ka Halfway Home, kadei ka project kaba la pyniaid da ka Society for Urban and Rural Empowerment (SURE), kaba dei ka jaka ai jingri bad sumar ia ki briew kiba la koit na ki jingpang ba duna ha ka bor pyrkhat, ki bym donkam shuh ban leit thiah ha ki hospital, hynrei ki bym don iing don sem ne kiba la shah kyntait ha la ki bahaiing. Ia katei ka jaka sumar la plie ha ka 28 u Jylliew 2023.
Lah ban kdew ba ka Halfway Home ha Jowai kala lah ban leit buh biang ia ki arngut ki nongpang sha ki iing ki sem jongki. Kadei tang ka Halfway Home kaba long napdeng ki 4 tylli ha ka jylla kaba la ioh jingkyrshan na ka Directorate of Social Welfare, Shillong, kaba la lah ban kynjoh ia utei u mawmer.
Ia ka Halfway Home la wan ban mihkhmat da ka Project Coordinator, Niwanka Shylla bad ka nongtrei.mon sngewbha Ilasiewdor Gashnga, Dr. H. Niang Block Development Officer jongka Thadlaskein Development Block, ruh ula iadonlang.
U Myntri Rangbah ula ai khublei ia ki nongtrei bad pynpaw ia ka jingsngewnguh ia ki seng trei mon sngewbha halor ka jingai iaka jingshakri kaba kordor ia ka jylla bad ula kitbok ia ki ba kin iai bteng ban long kiba seisoh ha ki snem kiban dang wan.
, ha Chief Minister’s Office, Shillong.){kind=link}