Shillong Naitung 10: Ka sorkar jylla kala aiti ia ka kaiphod jingtohkit ha ka iingkashari Meghalaya High Court halor ka jingkynnoh ba ka don ka jingtih be-ain ia u mawshun ha ka thain Jaintia da ka Amrit Cement Industries Limited.
Ia kane ka kaiphod jingtohkit la shim kum ka rekod ha ka jingtian bishar ia ka PIL kaba la mudui da u Ranjit Chandra Goshwami hynne ka sngi Palei.
Ha ka hukum kaba la pynmih da ka Division Bench kaba la khlieh da u Chief Justice IP Mukerji bad Justice W Diengdoh kila ai por ia u nongiasaid ain uba mihkhmat ia u nongmudui ba un file affidavit ban jubab ia katei ka kaiphod bad kano kano ka jingpynshai lah ban phah lyngba ka ‘Affidavit’ da ka Amrit Cement Industries Limited hashwa ban don ka jingtian bishar ha ka 24 tyarik u Naitung.
Ia kane ka PIL la mudui katkum ka jingioh jingtip lyngba ka Right to Information Act, kaba kdew ba ka Amrit Cement Industries Limited kam shym la don ia ka lisen kaba pura ban tih ia u mawshun.
Katkum ki jingtip, ka kompani kala shah kynnoh ba kala shu tih be-ain ia u mawshun ban pyndonkam ha ka karkhana ban pynmih ia u dewbilat.
Ia kane ka PIL la pdiang ha ka 19 tarik u Rymphang 2025. Ka jingtohkit kaba la pynlong da ka sorkar jylla kadei katkum ka jingbthah jong ka iingbishar ha ka 8 tarik u Jymmang.
