Phah siew mar T.50,000 sha ki 15 ngut ki lanot
Shillong, K’lyngkot 30 : Ka Meghalaya Human Rights Commission (MHRC) kala aiti ia ka kaiphod jingbishar sha ka Sorkar halor ka jingujor ba pynkhein ia ka hok longbriew manbriew ha Rimpu Bagan, West Garo Hills.
Lah ban kdew hangne, ka Rimpu Bagan ka dei ka resort jong u MDC ka BJP na Tura bad Chairman ka ANVC-B bala pynduh pyndam.
Ia kane ka kaiphod jingbishar la phah sha u Principal Secretary ka Tnad kam Pohiing (Police) ha ryngkat ka jingai jingmut ban siew kum ka jingiarap (compensation) ba mar T.50,000 sha ki 15 ngut ki lanot ba shah pynkhein ka hok longbriew manbriew.
Kat kum ka kyrwoh na u Secretary ka MHRC L.Ch Marak, la pyntip ba ka Commission kala register haduh 30 tylli ki case ba iadei bad ka jingujor ba pynkhein ia ka hok longbriew manbriew ha ka por ba leit khynra ki Pulit bad set ia ki briew ha Rimpu Bagan, West Garo Hills ha ka 22 tarik Naitung 2022.
Ka ong ba napdeng ki 30 tylli ki case bala register, haduh 15 ngut ki nongujor kila weng noh ia ka case.
La pyntip ba ka Commission kala shong bishar tang ia 15 tylli ki case bad hadien ka jingbishar ia ki sabut na baroh arliang mamla, ka Commission kala pynmih ia ka hukum ha ka 29 tarik Kyllalyngkot 2026 bad phah sha u Principal Secretary ka Sorkar Jylla.
 kala aiti ia ka kaiphod jingbishar sha ka Sorkar halor ka jingujor ba pynkhein ia ka hok longbriew manbriew ha Rimpu Bagan, West Garo Hills.){kind=link}