Shillong, Nailar 13 : Ka Meghalaya State Education Commission ha ka sngi Balang, kala aiti ia ka kaiphod sha u Myntri Rangbah ka Jylla Conrad K Sangma.
Kiba iadonlang ki kynthup ia u Chief Secretary Bah DP Wahlang nalor ki dkhot ka State Education Commission bad ki Ophisar na ka Tnad Pule Puthi ka Jylla.
Ka Kaiphod jong ka Meghalaya State Education Commission ka ai ia ki jingshem ba kongsan shaphang ka jingkylla ha ka liang ka pule puthi jong ka Jylla. Ka Commission kaba la pynkha hapoh ka tnad pule puthi ha ka 26 tarik Naitung, 2023, la thaw kum ka sienjam ban leh eiei halor ki mat ba kongsan kiba dang mih ia kiba la kdew ha ka National Education Policy 2020 (NEP2020).
Ka kaiphod ka wad bniah ia ki bynta kiba kongsan kum ka jingpynskhem ia ki skul, ka jingpynkylla ia ka pule puthi kaba kham shalor, ka jingai jinghikai ia ki nonghikai, ka jinglehbha jong ki khynnah skul, bad ki jingkylla ha ka rukom treikam hapoh ka tnad.
Da kaba shim na ki jingïamir jingmut ba bniah bad ki nonghikai, ki stad ki jhad, bad ki seng nonghikai, ka kaiphod ka long kum ka jingïalam lynti kaba kongsan na ka bynta ki nongshim bynta bad ki nongthaw polisi kiba trei ban thaw dur ïa ka lawei jong ka pule puthi ha Meghalaya.
Ki bynta ba kongsan jong ka Meghalaya State Education Commission ki long ban pynbeit ia ki jingiapher ha ka jingioh tulop hapdeng ki nonghikai, ki buit treikam ban weng ia ka jingpynslem ban thung kam, ban pynkhlain ia ka rukom pyniaid iaki skul bad kolej, ban pynthikna ia ka jingpule kaba bha ha baroh ki kyrdan jong ka pule puthi bad ban pyntreikam ia ki nongrim jong ka NEP.
Ka Report ka don ruh ia ki jingai jingmut ba kongsan na ka bynta ka jingpule ha ki skul, ki jingpule ha ki kyrdan ba shalor, ki skulbah jong ka jylla, ki kolej, ka jingi jinghikai ia ki nonghikai bad ki polytechnics.
Haba kren ha ka jingialang, u Myntri Rangbah ka Jylla Conrad K Sangma u la ong ba ka State Education Commission ka long kaba kongsan bha na ka bynta ka tnad pule puthi ka ban don ka jingkylla kaba kongsan ha ka lawei jong ka Jylla.
“Ngim kwah ba kane ka kaiphod kan shu sahkut shijaka bad sop pui pui bad ka sorkar kan pyntreikam ïa baroh ki jingai jingmut kiba lah ban long jong ka Commission bad kan thaw ruh ïa ka Expert Committee kumba la ai jingmut da ka Commission ban rah bad pyniaid ïa ki jingai jingmut jong ka komishon shakhmat,” u la ong.
