Aipor shitaiew ka SSTP ia ka Airtel bad Jio ban pynbiang ia ka Network ha thain Tyrso

Nongpoh, 22 Naitung: Ka Seng Samla Tyrso Pyllun (SSTP), ka la aipor shitaiew ia ka kompani Airtel bad Jio ba kin pynbiang mardor ia ki mobile network ha ka thain Tyrso lem kumta ka seng kan sa rai aiu ban leh pyrshah ia kine ki kompani.

Kane ka Seng lyngba ka kyrwoh bala phah da ki Nongialam u Pynsuk Sten bad Player Mashli, kala pynpaw ia ka jingbitar halor ka jingthut palat ka mobile network jong ka Jio bad Airtel, kaba la pynsohsat ia ki paidbah kiba shong ba sah ha ka thain.

Kat kum ka jingong jong ki, ki shnong kiba shah ktah eh ha kane ka jingthut ka network kine ki kompani ki don haduh 12 tylli.

Ka SSTP ka la pan jingpynshai na ka Kompani Airtel bad Jio, ba balei ba kim lah ban pynbiang ia ka Network kaba paka ha katei ka thain.

Kala ong ba ka jingjah Network ha ka thain ka long da ki taiew bad kaba la ktah eh ia ki paidbah, namar tang ka bai recharge ruh ka la dep da ki spah spah tyngka, hynrei ia ka Network pat kim ioh ia kaba biang, kaba la pynsuba ruh ia ka SSTP, ba kitei ki Kompani ki la shu wanleh Bussiness ha katei ka thain khlem da pyrkhat pat ia ka jingdonkam ki paidbah.

Ka SSTP ka dawa ia ka Kompani Jio bad Airtel, ba ki dei ban pynbiang mardor noh ia ka network ha katei ka thain bad aipor shi taiew ia kine ki kompani lem kumta ka seng kan shim da kiwei pat ki sienjam.

Pule ruh: Manipur: Iakhih ki Kynthei ITLF ha ka kynroh sah jingmynsaw pyrshah ia ki kam thombor ia ki Kynthei Kuki