Shillong, K’lyngkot 19 : Ka Khasi Students’ Union (KSU) kala aipor shitaiew ia ka Meghalaya Public Service Commission (MPSC) ba kan pyntreikam ia ki jingai jingmut jong ka MPSC Reforms Committee ha ka kaiphod bala aiti sha ka Sorkar Jylla ha u snem bala lah, ban pynthikna ia ka jingshakri kaba shai bad jingbym shah liang ha ka thungkam thungjam.
Haba kren sha ki lad pathai khubor ha ka sngi Nyngjong, u Chairman ka KSU Employment Cell samla Reuben Najiar ulapynpaw ba watla ia ka kaiphod ka Committee la aiti naduh u Nailar 2025, ym pat don satia kano kano ka jingkylla kaba la pyntreikam, kaba la pynbor ia ka Union ban iakynduh ia u Chairman ka MPSC Bah D.Langstang.
“U Chairman ula ong ba ka Commission ka dang bishar bniah ia kane ka kam, hynrei kam don eiei satia ban bishar ia ka. Ki jingai jingmut ki dei ia kaba ka MPSC kan pyntreikam” ong u samla Reuben haba pynpaw ia ka jingbym sngewtynnad halor kane ka jingpynslem.
“Namar kata, ngi la aipor shitaiew ia u Chairman ka MPSC ban pyntreikam ia ki jingpynkylla kiba iadei bad ka jingpynlait paidbah ia ki marks bad kiwei kiwei ki jingpynkylla kiba don ha ka kaiphod khnang ba kan don ka jingtreikam kaba shai ha ka jingpyniaid ia ka thungkam thungjam namar ia mynta ngi lah iohi ba kam don satia ka jingshai ha ka thungkam thungjam” ula bynrap.
Ula ong ba ka KSU kala dawa ban pynlait paidbah ia ki marks, ka eksam da ka objective-type na ka bynta ki kam Grace-C bad D bad ba ki jingpynbna laitkam ki dei ban long tang ia ki nongshongshnong ka Meghalaya.
Haba kynnoh ia ka MPSC ba ka wanrah ia ki policy bapher bapher ban pyniaid katba mon ia ka eksam, u samla Reuben ula ong “Kawei na ki nuksa ka dei ka eksam typist kaba lah pynlong ha u bnai Naiwieng 2025. Ngi la iohi ba ha kiba bun ki khep ia ki eksam Grade-C bad D, ia ka eksam lah hap ban leh lyngba ki jingkylli ba lah ban jied (multiple choice) bad ka eksam dei ban leh da ka objective-type hynrei ha kane ka kynta, kila pynleh da ka descriptive type bad balei ki leh ia kane khnang ba kin lah ban ai marks kat kaba mon”.
“Lada pynlong da ka objective-type, lada ki don 50 tylli ki jingkylli bad phi dei ia 20 tylliki jingkylli, yn ym don mano mano ruh ba lah ban pynkylla ia ki marks hynrei ha ka descriptive type pat ka shong ha u examiner la un ai ia phi 10 lane 30 lane kano kano ka marks kat kaba u mon bad ym don iingkashari kiba lah ban tuklar ia kane ka kam. Kumta ki kwah ban ai marks kat kaba ki mon khnang ba kin lah ban thep kam iala ki jong ki briew” ula bynrap.
U samla Reuben ula ong “Ngi la pyrshah ia kane bad kum kane ka jingleh yn ym lah ban pdiang. Kawei ruh ka long ba ki jingpynbna laitkam nangne shakhmat kam dei shuh ban long ia ki nongshongshnong ka ri India hynrei ka dei ban long tang ia ki nongshongshnong ka Meghalaya bad ia kane lah ju leh ha baroh ka thain Shatei Lam Mihngi naba ki kam ha Jylla ki dei kiba la mang tang ia ki nongshongshnong jong ka Jylla ym ia baroh kawei ka ri”.
U nongialam ka KSU u la ong ba ka seng ka suba ba ka jingbym kwah jong ka MPSC ban pyntreikam ia ki jingpynkylla ka mih na ka jingkwah ban pynneh ia ka jingbym shai ha ka thung kam.
“Kim (MPSC) kwah ban pyntreikam ia kine ki jingkylla (lane ki jingpynkylla) namar ki long kiba biang bad ka rukom treikam kaba mynta, kaba la bamsap bad kaba lah ban pyndap ia la ki jong ki kyrtong katba ki kyrtong kiba biang bad kiba don jingkyrmen kim ioh kam katba ki briew kiba don jingiadei bad ki briew kiba lah ban siew ia ka pisa kaba heh ki ioh kam. Ki briew kin tip ia ki marks jong ki bad katno ki ioh ha ka interview bad ki briew kin sdang ban buh jingkylli, mano ba thoh ha ka eksamin, mano ba ioh ia ki marks kiba kim tip, ki tip tang hadien ba la pynmih ia ka result bad kine ki dei ki kyrteng kiba la pass hynrei kim tip wat lada ki leh RTI ruh kin ym iohh satia. Ta ka daw ki artatien ban wanrah ia kine ki jingkylla namar lada ki leh kan sa don ka jingpynrung kam kaba shai…,” ong u samla Reuben.
Ka KSY kala byrngem ban pynlong da ka jingiakhih lada ym pyntreikam noh ia kine ki jingpynkylla ia kajingtreikam ka MPSC hapoh ka shitaiew.
“….lada ka Commission kam lah ban pyntreikam ia kine ki jingpynkylla, kan pynbor ia ngi ban shim ia ki sien jam kiba tyngeh, kynthup ka jingpynsangeh ia ka jingpyniaid ia ki eksam thungkam thungjam tad haduh ban da wanrah ia ka jingkylla” ong ka KSU ha ka shithi sha u Chairman ka MPSC.
 kala aipor shitaiew ia ka Meghalaya Public Service Commission (MPSC) ba kan pyntreikam ia ki jingai jingmut jong ka MPSC Reforms Committee ha ka kaiphod bala aiti sha ka Sorkar Jylla ha u snem bala lah, ban pynthikna ia ka jingshakri kaba shai bad jingbym shah liang ha ka thungkam thungjam.){kind=link}