Nongpoh Nailur 18: Ka Hynniewtrep Youth Council Ri-Bhoi Sepngi, kala aipor shibnai ia baroh ki bar jylla ba trei ha ki petrol pump ba ki dei ban pynbiang noh ia ki Trading bad Labour Licence lem kumta kin shah beh krad sha Assam.
Kane ka jingbyrngem ka HYC Ri-Bhoi Sepngi kala mih hadien ka jingleit jurip ia kawei ka petrol pump kaba don ha Sohkyrbam Rim, hynne ka sngi Nyngkong, hadien ka jingioh khubor ba ki don ki bar jylla kiba wan trei ha kane ka jaka theh umphniang kali khlem ki kot ki sla.
Ia kane ka jingleit jurip la ialam da u President samla RC Thangkhiew bad u Vice President Samla John Makri.
Haba kren sha ki nongthoh khubor, u President ula ithuh ba ka jingjurip ia kane ka petrol pump ka dei halor ka jingpyn thikna ba ki bar jylla kiba wan trei ha kane ka pump, ki dei ki bym pynkhein ia ki kyndon ain ka KHADC bad kiwei kiwei ki ain.
U iathuh baka Seng kala lap haduh 4 ngut ki bar jylla kiba trei ha kane ka petrol pump khlem ki kot ki sla kiba biang khamtam ka Trading bad Labour Licence.
U iathuh ba ka seng kala iakynduh ia u Manager jong kane ka petrol pump bad bthah ba u dei ban pynbiang ia ki kot ki sla jong kine ki nongtrei.
“Ngi la aipor shibnai ia une u Manager lem kumta ka seng kan kyndang noh ia kine ki nongtrei bar jylla” ula ong.
