La pynduh lut ia baroh ki song jingmyntoi sha ki bym don Aadhaar
Shillong Jymmang 30: Ka Ophis jong u Development Commissioner, ka sorkar jylla kala kyntu ia baroh ki nongshong shnong ka Meghalaya, ki bym pat rejistar ne pynrung kyrteng Aadhaar, ba kin leit pynrung kyrteng noh ialade kham kloi ban nym duh ia ki song jingmyntoi bapher bapher bala ai da ka Sorkar India.
Kane ka jingkyrpad kala mih kadei hadien ba ka UIDAI kala pynmih iaka jingpynbna ba kala pynjlan sa 3 bnai ban pynrung kyrteng Aadhar ha ki jylla bad ki bym leit pynrung kyrteng kin ym ioh pdiang shuh ia kino kino ki jingiarap ne jingmyntoi na ka sorkar pdeng.
Lah ban kdew ba ka duna bha ka jingpynrung kyrteng Aadhar hapoh ka jylla Meghalaya bad ki nongshong shnong ki bym don Aadhar, shen ki lah ban duh noh ia ka lad ban ioh ia ki skhim bapher bapher na ka sorkar pdeng bad ki ban duhnong bha na kane kin dei ki kynthei bad ki khynnah ki ban ym ioh ia ka Supplementary Nutrition Programme (SNP) lyngba ka ICDS jongka Social Welfare Department.
Na ka jingbym don ia u Aadhar number, kin ioh tang 10 % ia ka SNP na ka bynta ki khunlung bad ki khynnah kiba don hapoh 6 snem ka rta bad ki kmie kiba pun khun bad kumjuh ruh kiba dang ai buin ia ki khun naduh ka Quarter ka ban wan.
Shuh shuh ka skhim kum ka Ayushman Bharat kaba la pyntreikam ha ka jylla kum ka Megha Health Insurance Scheme (MHIS) ka long kaba donkam ban don ia u Aadhar.
Watla iaka jylla Meghalaya ym shim la pynlong kongsan ban shim ia u Aadhaar hynrei yn ym lah ban pdiang ia ki jingmyntoi na ka sorkar pdeng khlem da don ia u Aadhaar number.
Ka don ka provision ha ka section-7 jongka Aadhaar Act ban ai jingiarap ia ki briew ban pynioh ia u Aadhaar number khnang ba kin lah ban ioh ia ki jingiarap, ki jingmyntoi bad ka jingshakri.
Kumta ban pynshlur ia ki jylla ba kan don ka jingshim ia u Aadhar number da baroh ki nongshong shnong ka jylla ban ioh iaki Central Government Welfare Schemes, ka “50 days Aadhar saturation programme” la sdang pyntreikam ha ka jylla ba la leh ia kane na ka bynta ki khunlung kiba dang shu kha, ki khynnah rit, ki longkmie bad kiwei kiwei ki bym pat don ia u Aadhar number khamtam haba ka jingrejistar Aadhar ka long tang kumba 10-12 %.
Ban pynsted ia ka jingrejistar Aadhar ha ka jylla bad ha kylleng ki district kila pynkhreh iaka Action Plans, ha kaba yn don ruh iaki enrolment camps bad baroh ki Deputy Commissioners kin sa pyndonkam ia baroh ki lad ki lynti ban pyndonkam ia ki ophisar bad iaka bhah tyngka na kiba don bynta baroh kum ka tnad Community & Rural Development, Food & Civil Supplies, Education, Health bad Meghalaya State Rural Development Society (MSRLS).
Ka Nodal Department jong ka Aadhar ha ka sorkar jylla kadei ka tnad General Administration Department ha kaba la sdang iaka jingialam lynti lyngba ka ‘Support Team’ bad kala dep ruh ban bhah ia ka song tyngka halor ka “50 days Aadhar saturation campaign”.
Ki Deputy Commissioners kin iatrei ryngkat lang bad baroh ki Child Development Project Officers (CDPO), Anganwadi Workers and Helpers, Village Employment Councils (VECs) bad ki Self Help Groups (SHG) ha ka jylla bad kin thaw ruh ia la ki buit treikam bad ban kynthup lang ia ki kynhun trei mon sngewbha, ki sengbhalang bad ki lad pathai khubor ban ioh iaka jingkyrshan bad ban pynkhlain ia katei ka campaign.
