Nongstoiñ, Risaw 8: Ka Federation of All School Teachers Of Meghalaya (FASTOM), kala aipor ia ka Sorkar Jylla ba kan pyntreikam noh ia baroh ki mat jingdawa jong ka synjuk kynthup ka jingkyntiew kyrdan ia ki skul Adhoc sha ki Deficit System hapoh u bnai Iaiong, 2024.
Kane ka rai jong ka FASTOM kaba kynthup ia ki skul Adhoc jong ki Lower Primary, Upper Primary, Secondary bad Higher Secondary, kala mih na ka jingialang kaba long ha madan New Nongstoin myn ha ka sngi Saitjain bala lah.
Kane ka synjuk kala pynmaw ia ki san tylli ki mat jingdawa kiba la sahteng la slem kiba ka Sorkar kam pat leh eiei haduh mynta bad kine ki mat ki kynthup ia ka jingkyntiew kyrdan ia baroh ki skul Adhoc sha ki Deficit System, ban pynjlan їa ka rta treikam jong ki nonghikai, ban kyntiew їa ka Annual increment sha ka 5 % , ban siew ryntih man u bnai їa ka tulop jong ki nonghikai da kaba pynrung ha ki personal Bank Account jong ki bad ban ym buh kyndon їa ka snem jong ki nonghikai lada ki apply kam sorkar.
Ia kane ka jingialang la pyniaid da u babu Sonborn Jungai Vice President bad kiba la ai jingkren ki kynthup ia u babu Wanhun Masar, u babu Elvis Marak, bad na u babu Diningroy Marweiñ.
Kitei ki nongїalam ka FASTOM haba kren ha ka jingїalang, ki la pynpaw їa ka jingsngewkhia kaba jur halor ka jing pynsahteng ka sorkar їa ki san tylli ki mat ba ka synjuk la dawa na ka por sha ka por.
Kine ki Nonghikai ki la ther tyngeh ruh їa ka sorkar da kaba ong ba ka jingdawa jong ki kam shym dei shuh kaba thymmai. hynrei kaba la їaid da ki bun bun snem bad ki dorkhas ba ki la submit sha ka sorkar ruh, ki long ym shuh tang da ki phew hynrei ki la jan kot spah tylli.
Ki la iathuh ruh ba ki la leit ban їakren la bunsien bad ka sorkar lyngba ki bor ba dei peit їa ki kam skul naduh ka por jong u Dr. R.C Laloo haduh kine ki sngi. La ong ruh ba haba phai sha ki jingeh ba ki nonghikai skul Adhoc ki їakynduh, ka long thik kumba ka sorkar kam kheiñ briew satia bad ka long thik kumba katei ka kam hikai ka dei ka kam kaba tang shi por.
Kane ka jingialang da kawei ka jingmut ka la rai ban ai por їa ka sorkar haduh ka 30 tarik u bnai Ïaїong 2024 ba kan pyntrei kam noh їa baroh san tylli ki mat jingdawa haba maham ba ka seng kam banse ban mih biang ha surok ban pynlong da ki jingїakhih kiba kham tyngeh lada kane ka jingaipor kam seisoh.
Na ka bynta ban pynsuk їa ka jingtreikam, ka synjuk ka la thung ruh їa ki nongkitkam na ka bynta ka Khasi Jaiñtia Region na ka bynta ka samoi treikam jong u snem 2023 haduh 2026. Ki nongkitkam ki kynthup їa u President babu Dingroy Marweiñ, Vice president babu Sonborn Jungai & babu Kinstar Momin, Secretary babu Saiñbor John Lyngdoh, Joint secy Mrs Deviana Syiem, Miss Evangeline Ñiangti & babu Senedro Marak, Finace secy babu R.Sparland Khardewsaw, Organising secy babu Rapborron Kharsynteng & babu Biarson Marak, Pubicity secy babu E.G.War, Auditors babu Evansius Marweiñ & babu David Lyngkhoi. La pynskhem їa kitei ki nongkitkam da u babu Elvis Marak president ka FASTOM Garo Hills Region.
