Shillong, Nailar 09: Ka Hynniewtrep Youth Council (HYC) hynne ka sngi ka la dawa ban pynkynriah sha kawei ka jaka ia ka Opioid Substitution Therapy (OST) Centre na Shillong Civil hospital hapoh 7 sngi.
Ha ka shithi sha Director of Health Services (MI), u president ka HYC Bah Roykupar Synrem u la ong ba ka Council ka la ioh shibun ki jingujor na ki paidbah, ki nongtrei jong ka hospital, bad ki nongpang halor ka jingpynthut jong ki briew shimet kiba leit sha ka OST Centre jong ka Hospital.
Kine ki riew shimet ki la donkti ha ki jingjia tuh, hapoh bad shabar jong ki iing ka hospital, kaba la pynlong ia ka jingpyrshah bad kaba khlem jingshngain ia baroh.
“Ha ka 9 tarik u Nailar 2024, ka seng jong ka la pynlong ïa ka jingtohkit halor kine ki jingujor bad la kem ïa ki briew shimet kiba don ïa ki tiar ba la suba tuh, kynthup ïa ki tiar buh drok ki bym pat pyndonkam bad ki mobile phone. Kine ki riew shimet ki la kam ba ki dei ki nongdih drok bad kiba ju leit sha katei ka OST Centre. Ka paw shai ba ka jaka kaba mynta jong ka OST Centre ka nang pynjur shuh shuh ia kine ki kam sniew. Ka jingleh jong kine ki briew ka wanrah jingeh kaba khraw ïa ki nongpang, ki nongsumar jong ki, bad ki nongtrei jong ka hospital,” la ong u Bah Roykupar.
“Kumta ngi kyrpad kyrkieh ban pynkynriah noh mardor ïa ka OST Centre sha ka jaka kaba kham biang, kaba bha eh ka long shabar jaka paidbah. Ngi ngeit ba kane ka jingleh ka long kaba donkam ban ïada ïa ka jingbha jingmiat bad ka jingshngaiñ jong baroh kiba pyndonkam ïa ki jingshakri jong ka hospital,” ula ong.
“Ngi kyrpad ba ïa kane ka kam dei ban pynbeit hapoh kine ki hynniew sngi ban wan. Lada ym don kano kano ka jingleh, ngim banse ban shim ïa ki lad ki lynti kiba kham bniah ban weng ïa kane ka jingeh kaba jur bha,” u la maham.
 hynne ka sngi ka la dawa ban pynkynriah sha kawei ka jaka ia ka Opioid Substitution Therapy (OST) Centre na Shillong Civil hospital hapoh 7 sngi.){kind=link}