Shillong, Risaw 15 : Ka Karbi Students Union (KSU) kala aipor laibnai ia ka Sorkar Assam ba kan pynbeit noh ia ka jingiakajia pud bad ka Jylla Meghalaya lane ai noh da la ka jong ka Jylla sha ka Karbi Anglong.
Ka jingdawa kala mih tang da ki sngi hadien ka jingjia iaumsnam hapdeng ki Karbi bad ki Pnar ha ka shnong Lapangap, West Jaintia Hills, kaba lam sha ka jingiap uwei u nong Karbi Oriwel Timung.
“Kane ka jingjia ka pyni ia ka jingbym lah jong ka Sorkar Assam ban pynthikna ia ka jinglong trai i u pud u sam jong ka West Karbi Anglong bad ruh ka pyni ruh ba ka Sorkar Assam kam shimkhia satia ban pynskhem ia u pud u sam khamtam jong ka Karbi Anglong bad West Karbi Anglong District” ong u President ka KSU Tokbi Sarim Tokbi ha ka kyrwoh ba pynmih ha ka sngi Balang.
Ula ong ba wat hapdeng ka MoU bala iasoi hapdeng ka Sorkar Assam bad Meghalaya ha u snem 2022, kum kine ki jingjia kila nang jia na ka por sha ka por ha Tapat bad ka thain Dhansiri.
“Ngi buh ia ka jingaipor jong ngi hakhmat ka Sorkar lyngba kane ka lad phah khubor ba kan pynbeit noh ia u pud u sam hapoh 3 bnai lane ai noh sha ngi iala ka jong ka Jylla khnang ba ki paidbah ka Karbi Anglong bad West Karbi Anglong kin lah ban shim hi hala ka jong ka kti ban iada ia u pud u sam namar ka Sorkar Assam kam don jingsngewkhia bad ym niew kor ia ka jingim bad ka khyndew ka shyiap jong ki Karbi bad kiwei ki trai muluk bas ah ha kine ki artylli ki District ka KAAC” bynrap u Tokbi.
Ka KSU kala buh ruh ia ki kyndon hakhmat ka Sorkar Assam ba kan leh eiei ha kaban iada ia ka bha ka miat ki Karbi bad kiwei ki trai muluk ka thain KAAC da kaba aiti noh ia ka kam shongsuk shongsain (Border Management) sha ka Karbi Anglong ba kan pyniaid hi iala u pud u sam bad pynkhem ia ka jinglong trai jaka.
Kala dawa ruh ia ka Sorkar Assam ban shah ia ki paidbah bas ah ha khappid ka West Karbi Anglong bad ka Meghalaya bad kumjuh ruh ka Karbi Anglong bad ka Nagaland ba kin buh suloi hapoh ka Arm Licence Rule ba kin iada ialade na ki kam thombor ha khappud.
“Lada ka Sorkar kam lah ban pyntreikam ia kine ki kyndon bala buh, ka Assam kam don hok ban iai bteng ha kaban synshar ia ka KAAC bad ka dei ban ai noh iala ka jong ka Jylla kat kum ka Article 3 jong ka Riti Synshar ka Ri” ula ong.
 kala aipor laibnai ia ka Sorkar Assam ba kan pynbeit noh ia ka jingiakajia pud bad ka Jylla Meghalaya lane ai noh da la ka jong ka Jylla sha ka Karbi Anglong.){kind=link}