Shillong, Naiwieng 13 : Ka Hynniewtrep Border Disputed Redressal Forum (HBDRF) kala dawa ia ka Sorkar Jylla ban ai jingtip ia kaei kaba long ba man mynta (status) haba iadei bad ka kam Block-I hapoh ka artaiew.
Ha ka shithi bala aiti sha u Myntri Rangbah ka Jylla Conrad K Sangma ha ka sngi Palei, u Chairman ka HBDRF Bah Chandame Sungoh ula ong “Ngi kyrpad hangne ia ka Sorkar Jylla ban pyntip ia ka HBDRF hapoh ka artatiew na ka sngi ba ioh pdiang ia ka shithi halor ka jinglong jingman jong kane ka kam bala kdew haneng”.
“Ngi iai bteng ban don ka jingkyrmen ba ka Sorkar kan ai ia ka jubab da ka jingsngewbha bad shim ha khmat eh ia ki lad ki lynti ban pynbeit halor kane ka kam ha ka kyrteng jong ka jingtreikam kaba shai, kaba don jingkitkhlieh bad ka bha ka miat ka imlang sahlang” ula bynrap.
Ka Forum kala pynpaw ia ka jingsngewkhia ba wat hapdeng shibun ki jingthoh bad jingalang, kam pat shym la don ka jingaiktien ia kano kano ka jubab lane ka plan ban leh eiei halor kane ka kam.
Ka ong ba ka HBDRF kala ai ia ka shithi sha u Myntru Rangbah halor ka kam Block-I ha ka 1 tarik Rymphang, 2024, ka shithi bala ai sha u CM, DyCM Bah Sniawbhalang Dhar bad Bah Prestone Tynsong lem bad u Chief Secretary ha ka 25 tarik Jylliew 2025, ba long pyrshah ia ka jingkynnoh leh donbor jong ka Socheng Amreng Border Development Committee (SABDC), ba dawa ban register ia ki jaka bad ka jingpynieng biang ia ka khyrdop khajna ha shnong Khanduli, ka jingiakynduh markhmat bad u Myntri Rangbah bad ki Heh Ophisar ha ka 25 tarik Jymmang 2025, bad ka shithi ba kyrpad ban ai jingithuh ia ki shnong ka Elaka Labang Nangphyllut kumba la pynbna da ka Jaintia Hills Autonomous District Council (JHADC) haka 13 tarik Nailar 2025.
Ka Forum ka shimkhia ia ka jingbym don kano kano ka jubab halor ka jinglong jingman jong kine ki kam bad maham ba ka jingsngap jar ka long kaba sngewkhia jur haba khmih ia ka jingktah ia ka imlang sahlang bad ka roi ka par jong ki nongshongshnong ba sah ha khappud.
 kala dawa ia ka Sorkar Jylla ban ai jingtip ia kaei kaba long ba man mynta (status) haba iadei bad ka kam Block-I hapoh ka artaiew.){kind=link}