Shillong, K’Lyngkot 22: Ka Hynniewtrep Youth Council (HYC) hynne ka sngi Nyngkong, kala ai por 10 sngi iaka North Eastern Indira Gandhi Regional Institute of Health and Medical Sciences (NEIGRIHMS) ban pynurlong iaki 6 tylli ki jingdawa kiba don bynta haka rukom them kam hapoh ka Hospital.
Lyngba ka shithi sha u Director ka NEIGRIHMS, u President ka HYC Bah Roy Kupar Synrem ula ong baka seng ka pyrshah jur iaka jinglong pyrshah riewlum ki policy thungkam ka NEIGRIHMS ha ki bnai bala dep haba iadei bad ka kabu thepkam ki samla trai Ri.
“Ngi kyrmen ba kum u khlieh duh ka NEIGRIHMS un shimkhia iaka jingdawa kiba dei ruh naka bynta ka bha ka miat ki samla trai Ri bad ka Jylla baroh kawei bad ia kine ki jingdawa dei ban pynurlong noh hapoh 10 sngi” la ong u Bah Roykupar.
U Bah Roykupar ula ong byrngem daka ba ong “Lada ka NEIGRIHMS kam lah ban pynurlong, ka seng kan sa lum iaki samla trai Ri ban tur sha NEIGRIHMS ban khang tala syndon ia kane ka Hospital”.
Haba pynpaw iaki 6 tylli ki jingdawa ka seng, u President ka HYC ula ong ba ka rai jong ka NEIGRIHMS ban khot thepkam Nursing Officers lyngba ka NORCET kala pynduh mynsiem iaki samla trai Ri ban ioh kam Nurse ha kane ka Hospital.
“Namar kane ngi dawa ban ka jingkhot thepkam dei ban pynlong beit daka NEIGRIHMS bad dei ban pyndam noh iaka jingkhot thepkam daka NORCET naduh mynta” ula ong.
U Bah Roykupar ula ong “Ka jingkhot thepkam naka bynta ki kam bapher bapher hapoh kane ka Hospital dei ban pynglong beit daka NEIGRIHMS ym da kiwei pat ki Company ne Agency na bar Jylla bad ki jingthep kam kidei ban long beit hapoh Meghalaya ym shabar ka Jylla bad ki Outsourcing Agency ruh ki dei ban dei daki ba napoh ka Meghalaya ym na shabar”.
Ula ong ba ka HYC ka dawa ruh ba baroh ki nongtrei Contractual bad Casual kidei ban ioh beit daki samla trai Ri kiba kot bor bad baroh ki nongtrei kum ki Nurse kiba la trei slem hapoh kane ka Hospital kidei ban shah kynthup lang ha juh baroh.
“Naka bynta ki kam haki Group B bad C categories, ka NEIGRIHMS kadei ban mang lypa 80% Reservations iaki samla ka Meghalaya” ula ong.
