Shillong, K’lyngkot 10 : Ka Sorkar Jylla kala rai ban pynkupbor ia ki Executive Engineer ha ka Tnad Fisheries ba kin shim rai nalade ia ki project kat kum ka jingmang pisa.
Hadien ba pyniaid ia ka jingialang jong ka Kynhun Myntri ha Sohra hynne ka sngi Thohdieng, u Myntri Rangbah Conrad K Sangma ula ong ba kane kam ju don mynshuwa kaba mut ba ki Executive Engineer kin nym lah ban pyniaid ia ki kam bad ki hap ban leit pan jingbit manla ka por.
“Kumta, ia kane la leh kat kum ki kyndon ba don ha kiwei ki Tnad, ha kaba ki Executive Engineer kin ioh ia ka bor bala buh da u pud ban rai halor ka pisa pilain. Kaei kaba don ha kiwei ki Tnad, kum kane ka juh ka bor ban shimrai halor ka pisa pilain la air uh sha ki Executive Engineer ka Tnad Fisheries” ula ong.
Ha kajuh ka por, ka Kynhun Myntri kala dep rai ruh ia ka thup jong ki VIP, ki ban shim salute ha ka jingrakhe Republic Day ban wan ha kylleng ka Jylla.
