Shillong, Jylliew 11 : Ka Iingkashari Chief Judicial Magistrate (CJM) kala aibor ban set 8 sngi ia ka Sonam Raghuvanshi bad ia ki 4 ngut, ba kin tohkit ki Pulit hapohka police custody namar ka jingdon kti ban pyniap ia u Raja Raghuvanshi, u nong Indore ba shah pyniap ha ka jingwan leh honeymoon ha Sohra.
“Ka Iingkashari kala hukum ban set 8 sngi ia baroh 5 ngut hapoh ka police custody” pyntip u Bah Vivek Syiem, Superintendent of Police ka East Khasi Hills.
Ia kine ki san ngut la ialam tian bishar ha ka janmiet sngi Balang hadien ka jingwan rah ia ki na Madhya Pradesh bad Uttar Pradesh.
Ka kurim pyniap lok Sonam Raghuvanshi, kaba la suba suhbuit ban pyniap iala u kurim Raja Raghuvanshi, kala wan poi ha ka step phyrngap ka sngi Balang ha Shillong Sadar Police Station katba ki 4 ngut kiwei pat kiba wan poi ha ka por 10 baje tam mynstep.
Ki 4 ngut ki runar ba kynthup ia u samla ka Sonam Raj Kushwaha, Akash Rajput (19), u Vishal Singh Chauhan (22) bad u Anand Kuli (23).
Hashuwa ka rai ba ai ka Iingkashari, u Superintendent of Police ka East Khasi Hills Bah Vivek Syiem, ula pyntip ba ki Pulit kila pan 10 sngi ka por na ka Iingkashari ba kin pynlong jingtohkit ia ka Sonam lem bad ia ki 4 ngut.
“Ka jingtohkit kan sa sdang shen mar syn ioh ia ka por ban pynlong ia ka jingtohkit. Ngi la pan 10 sngi ban set ha ka police custody bad lada donkam bun, ngin sa nang buh ia ka jingkyrpad ban aipor” ong u Superintendent of Police ka East Khasi Hills Bah Vivek Syiem haba iakren bad ki nongthoh khubor.
Haba kylli, u SP ula ong ba ia mynta, ki Pulit ki dang kem tang 5 ngut kiba donkti ha kane ka jingpyniap ia u Raja.
“Katba ka jingtohkit ka dang iaid, ngin sa nang lah ban pynthikna la ki dei tang kine ki briew ba donkti lane ki don kiwei ruh kiba donkti lang” ula bynrap.
Halor ka jingpynwandur biang ia kaei kaba la jia, u SP ula ong ba ia kine ki 5 ngut yn nym ialam satia lashai ka sngi sa Sohra namar ki dang hap ban bishar ban tohkit shuwa.
“Pat dei lashai. Ngi hap ban tohkit shuwa ia ki. Hadien ba ngi la dep tohkit, la dep buh jingthoh ia ki jingbatai jong ki, ynda ngi la ioh ia ki jingshisha baroh halor kane ka kam, ka SIT kan sa shim rai ia ka sngi ba lano kin leit hiar sha Sohra ban phah batai ia kiei kiei baroh kiba la jia” ula ong.
Nalor kane, u Bah Vivek ula iathuh ba ka medical report jong ka Sonam kala pyni ba kam pat armet satia.
Ka Sonam kala iasuhbuit bad la u jong u baieid, u Raj Kushwaha, uwei na kiba shah kem, ban pyniap ia u Raja Raghuvanshi bad kala thong pisa haduh T.20 lak ia ki laingut kiwei pat, ba kin leh ia kane ka kam ha ka jaka pynieng kali jong ka Kshaid Wei Sawdong myn ha ka 23 tarik Jymmang.
Ka Sonam bad u Raja Raghuvanshi ki dang shu dep iathoh shongkurim ha ka 11 tarik Jymmang. Ka jingsuhbuit ban pyniap ia u Raja kala jia tang da ki sngi hadien ba dep iathoh.
Ha ka jingtohkit ki Pulit, la iathuh ba ka Sonam kala byrngem lypa ha ka Kmie ba kim dei ban pyniathoh shongkurim ia ka bad u Raja Raghuvanshi haba maham ba “Lada pyniathoh jubor, sa peit ia kaei ka ban jia ia une u briew”.
Kat kum ka khubor ba dang shu ioh, ka kynhun Special Investigation Team (SIT) ka Jylla, kala hiar khynra hynne ka sngi ia kawei ka Lodge ha Guwahati bala tip kyrteng ka Anand Lodge-ka jaka ba sahmiet ka Sonam bad u Raja Raghuvanshi.
Ka SIT kala ioh lum ia ka sakhi ba ki laingut ki briew ba pyniap ia u Raja, u Vishal, Akash bad Anand, kila wan poi ha kane ka Lodge ha ka 19 tarik Jymmang bad kila sah haduh ka 20 tarik Jymmang.
Kine ki briew kiba la pynithuh ialade kum ki samla pule, kila rung ha kane ka Lodge ha ka por 8:30 baje mynmiet bad kila mih pat ha ka sngi kaba bud ha ka por 5:30 baje janmiet.
 kala aibor ban set 8 sngi ia ka Sonam Raghuvanshi bad ia ki 4 ngut, ba kin tohkit ki Pulit hapohka police custody namar ka jingdon kti ban pyniap ia u Raja Raghuvanshi, u nong Indore ba shah pyniap ha ka jingwan leh honeymoon ha Sohra.){kind=link}