Shillong, Nailar 25: Ka Sorkar jylla lyngba ka tnat Art and Culture hynne ka sngi Thohdieng, kala mang ia ka jaka kaba heh kumba 5000 Square Feet ha Mawlai Iewrynghep ban ai shaka Khasi Author Society (KAS) ba kan tei iaka Ophis treikam.
Ia kane la pynbna da u Myntri ka tnat Arts and Culture bah Paul Lyngdoh uba la iathuh ba kane ka jingmang jaka iaka KAS ban tei iaka ophis treikam kadei ruh ban ai mynsiem iaka seng haka jingiakhun ban ioh iaka jingithuh iaka ktien Khasi haka khyrnit kaba phra jong ka riti synshar ka ri India.
“Kum shi bynta ban nang pynshlur iaka KAS haka jingiakhun ban ioh ka jingithuh iaka ktien Khasi haka khyrnit kaba phra jong ka riti synshar ka ri India, ka tnat Arts and Culture ka sorkar jylla kala mang ban ai 5000 Square Feet sha ka KAS ba kan tei iaka ophis treikam hapoh ka jaka jong ka Tribal Research Institute kaba don ha Mawlai Iewrynghep mar pyrshah iaka ktem ki Pulit CRPF” ong u bah Paul.
U bah Paul ula ong ba ka sorkar ka ngeit baka jingdon ka KAS iala ka ophis treikam kan nang pynkhlain shuh shuh iaka KAS haka jingiakhun ban ioh jingithuh noh iaka ktien Khasi.
Ula iathuh ruh ba ka KAS ka don jingthmu ban pynlong daka National Seminar ha nongbah Delhi bad ban shongkyllain mungor ha Jantar Mantar kum ka dak ban pyni iaka jingiakhun ban ioh ka jingithuh iaka ktien Khasi.
Haba kylli halor ka jingslem ban ioh jingithuh ka ktien Khasi u bah Paul ula ong “Ngam kwah ban kynnoh iano iano ruh hynrei ka ktien kaba la dei ka Sobjek pule haka kyrdan Graduation Level hapoh ka Calcutta University haki snem 1900, kala don hok shisha ban ioh noh iaka jingithuh”.
