Imphal, Jymmang 18 : Ki shipai Indian Army bad ki Assam Rifles kila ai ia ka bor pahara kaba khlain ia ki trok kit marbam bad ba kit ia ki mar ki mata sha Manipur, ban pynthikna ba ki marbam mardih bad ki jingdonkam baroh kin poi beit khlem kano kano ka jingthut sha kane ka Jylla kaba don hapdeng ka jingkulmar bad jingiakynad pher jaidbynriew.
Kat kum ka jingiathuh ki heh Sorkar, ia ka jingiaid jong ki trok kit mar kit mata lah peitngor ruh da ki drone ban pynthikna ba in iaid khlem kano kano ka jingma.
Ki Heh Sorkar ki iathuh ba naduh ka 15 tarik Jymmang, haduh 130 tylli ki trok kit marbam, dawai bad kiwei kiwei ki jingdonkam, kila wan rung sha Manipur na ki Highway bapher bapher.
Kila ong ba ha ka por ba dang jur bha ka jingkulmar ha Manipur, ka jingpynpoi mar sha ki jaka ba shongbun da ki Meitei ha Imphal, kala sageh namar ka jingpakhang surok bad ruh ka jingtieng hadpeng ki nongniah trok. Namar kata, ka jingpyn poi mardor ha ka Jylla kala duna bha bad sdang poi ha ka khep kaban buh ha ka jingkyrduh.
U Nongpathai khubor ka Tnad Shipai u pyntip ba ki shipai Indian Army bad ki Assam Rifles kila mih shakhmat ban pynthikna ia ka jingshngain jong ki kali kit marbam kiba rung bad ba mih na Imphal sha kiwei pat ki jaka ka Manipur.
Ha ka sngi nyngkong, haduh 28 tylli kynthup ia ki trok kit khaw, shini, dai, umphniang, kila ia iaid ryngkat hapoh ka jingpahara jong ki CRPF bad ki Pulit ka Manipur naduh na Noney District sha Imphal.
Kumjuh ruh sa 100 tylli ki kali kila iaid ha ka sngi Ba-ar bad sngi Balang.
