Shillong, Lber 09 : Ka Federation of Khasi Jaiñtia and Garo People (FKJGP) Central Body hynne ka sngi Saitjain, kala pynkup burom ia ka kynhun JETS 24×7, ka kynhun ki samla ba kamai thuk thuk ha Nongbah Shillong, kum shibynta ban ai mynsiem ia ka jinglah jong ki ban ieng hala ki jong ki kjat.
Kane ka kynhun JETS 24×7 ka dei kaba dang shu ioh jingthih shen na ka Sorkar Jylla ba kan pyniaid ia ka kam kamai thuk thuk ha ka Jylla.
Ka FKJGP Central Body bala ialam da u President bah Dundee C Khongsit, kala pynkup burom ia ka kynhun ha ka jingialang kaba long ha Ophis treikam ka seng ha Mawlai Kynton Massar.
Haba ai jingkren, u Bah Dundee ula ong ba kum ka seng (FKJGP) kaba don ka jingangnud ban kyntiew ia ka ioh ka kot ka Jylla bad ban pynshlur ia ki khun samla ba kin ieng hala ki kjat ba kin trai ri trai muluk kin bat hi ia u lakam jong ka khaii ka pateng, ka sngewdei ban pynkup burom ia kane ka kynhun kaba la trei minot khlem shongthait haduh ban ioh ia ka jingithuh n aka Sorkar ba kan pyniaid ia ka kam kamai thuk thuk ha Jylla.
“Kalong ka jingsarong ia ka Jaidbynrew ba ki khun samla kila kot bor bad don ka mynsiem iakhun bad kiwei pat ki kompani kiba wan ban sengkam hapoh ka Jylla jong ngi” ula ong.
U General Secretary ka Seng Bah Eldie Newton Lyngdoh ula ong ba kum ka Jaidbynriew kala dei ban bret noh shaba sep ka sngi ia ki kyntien phlan duman kiba ong ba ka Jaidbynriew jong ngi ka long kum ki tham kiba ialeh ban tan uwei ia uwei. Ula ong “Kum ka Jaidbynriew ngin pyneh rngiew noh da kaba ngin long ki nongkyrshan bad nongaibuit ban kyntiew iwei ia iwei”.
Kumjuh ruh u Senior Vice President Bah Elton Cliff Warjri ula kyntu ia ka kynhun JETS24x7 ba kin long kiba peitngor ba ki nongleit nongwan kin ioh ia ka jingshngain ha ka leit ka wan bad ha kajuh ka por ban tehlakam na ki nongshim kabu kiba pyrshang ban khniot dor ia u paidbah.
Na ka liang u Managing Director ka JETS 24×7 Bah Pynskhemlang W Uriah ula ai khublei ia ka seng FKJGP kaba ju ai lang ka kti ka mon ka kti ka diang n aka por sha ka por haba ka kynhun ka donkam ia ki jingai jingmut na kane ka seng.
