Shillong Naitung 29: Ki Nongtrei ka Raj Bhavan, Shillong hynne ka sngi Nyngkong, kila pynlong ia ka jingialang ai khublei khatduh ia u Lat ka jylla Phagu Chauhan, u ban sa mih noh na Jylla.
Ha kane ka jingialang ai khublei khatduh la wan iashimbynta da ki Ophisar bad ki nongtrei, ban pynpaw ïa ka jingsngewnguh bad ban kitbok kitrwiang ia u Lat ka jylla.
Haba ai jingkren u Lat ula ai khublei ïa ki nongtrei ka Raj Bhavan kiba la aiti lut ïa ka jingkyrshan bad kiba la trei met bad mynsiem ha baroh kine ki snem.
Hadien kane, ki heh ophisar na ki tnad bapher bapher ha Raj Bhavan kila ai jingkren lyngkot, da kaba pynpaw ïa ka jingsngewnguh kaba khraw ïa ka jingïalam bad ki jingnoh synñiang jong u Chauhan ha ka por ba u dang long kum u Lat ka jylla.
Ha kane ka sngi, la aiti ruh ha u Lat ia kawei ka jingthoh ai jingithuh bad la ai ruh ia ki jingai sngewbha kum ka dak jong ka jingsngewnguh bad jingburom ia ka jingshakri kaba ula aiti ia ka jylla.
Ki kam kiba paw kiba la leh da u Lat, ki kynthup ïa ka jingpynïeng ïa u Mawbynna shabar ki khyrdop bah jong ka Raj Bhavan ha ka jingrakhe dap 150 snem jong ka Raj Bhavan.
