Shillong, Nailur 15 : Ka Jylla Meghalaya kala ai khublei khatduh ia u Myntri Rangbah barim Dr D.D Lapang, uba la bat haduh san sien ia ka shuki kum u Khliehduh ka Synshar Khadar ka Jylla, ha ka jingleit ontep don burom bala pynlong da ka Sorkar ha ka sngi Nyngkong.
Ki Nongialam sain pyrthei na ki seng bapher bapher kila pyndon burom ia une u radbah ka sain hima sima bala shakri slem duh jong ka Jylla, uba la khlad noh ha ka hospital shimet ha Shillong myn ha ka 12 tarik Nailur.
Ia ka jingleit ontep don burom bala pynlong da ka Sorkar (State funeral) la pynlong ha Madan Student, Jaiaw bad la wan iashimbynta da u Myntri Rangbah ka Jylla Conrad K Sangma, ki Myntri Sorkar, ki Nongialam Sain pyrthei bad ki Ophisar na ka Sorkar Jylla ha ka jingiadon ryngkat ki bahaiing hasem.
Ki heh ki hain bad ki kynrem ki lyndan baroh kila buh syntiew ha ka synduk u (L) Dr DD Lapang kaba la tap don burom da ka lama lai rong ka Ri. Kala don ruh ka jingsiat suloi ba laisien ne ka gun salute, kum ka dak ka jingburom ia ka mynsiem bala leit noh jong une u Nongialam.
Wat hapdeng ka jingpynthut ka suinbneng, ki briew na kylleng ki jaka kynthup ki khynnah skul bad samla pule kila wan ban ai khublei khatduh ia une u Nongialam, hashuwa ban tep burom ia ka met ba sah jong u ha u Lum Jingtep ka Balang Presbyterian Jaiaw.
U Myntri Rangbah Conrad K Sangma ula ai ka burom naduh ka dohnud ia une u Myntri Rangbah barim Dr D.D Lapang, haba niew ia u kum u Nongialam ba trei minot hi, uba la aiti iala ka jong ka jingim ban shakri ia ka Meghalaya bad ki paidbah.
U Conrad ula pynkynmaw ia ka jingsdang kaba rit jong u Dr Lapang bad ka jingkiew jong u sha ka kyrdan kaba pawnam lyngba ka jingtrei shitom bad jingkut jingmut.
“Ka jingleit jong u (Lapang) kam dei satia tang jong lajong shimet, hynrei jong ka Meghalaya hi baroh kawei” ula ong haba kynmaw ia ka jinglong nongialam ba skhem u Dr Lapang, naduh ki sngi ba sdang ka jingiakhih Hill State haduh kaba mynta, kum ka sharak jong ka jingkyrmen bad ka jingskhem.
U Conrad ula iathuh khana ia ka jingiadei jong u shimet bad u Dr Lapang, haba ithuh ia u naduh ba u dang khynnah lyngba u Kpa, Purno A Sangma. Hadien ula ioh ia ka burom ban iashakri ha syndah bad u Dr Lapang hapoh ka Iingdorbar Thaw Ain, ha kaba ula sakhi ia ka jingaiti lut u Dr Lapang ban shakri shirthem ia ki paidbah.
“U dei ruh u nongkren uba don ia ka bor bad ula shakri da ka jingshemphang kum u Myntri Khynnah, Myntri Sorkar, Myntri Rangbah bad Nongialam ka Liang Pyrshah. Ka sur jong u kala sawa jam ha ki kynroh ka Iingdorbar Thaw Ain bad poi ruh sha u mawmer ba khatduh….”.
U Myntri Rangbah ula ban jur ruh ia ka jingngeit jong u Dr Lapang ha ka jingiakren, ka jingsuk bad ka roi ka par kaba suhthied na ka jingithuh kyrpang jong ka Meghalaya. Ula soh ia ki jinghikai u Dr Lapang halor ka kam nongialam, kaba ban jur ia ka jingshakri khlem da donkam ia ka jingiathap kti, ban ieng syndak u briew ba khatduh tam bad ban shakri ia kiba rit tam napdeng jong ngi.
U Conrad ula kren ruh halor ka synniang jong u Dr Lapang ia ka Jylla, kynthup ka jingpynkhlain ia ki bor synshar khadar, ka jingkynshew ha ki samla, ka jingpynshlur ban kyntiew ia ka jingbishar ba hok bad ba kdup lang ia baroh, bad ban plie lynti ia ka jingsuk lyngba ka jingiateh kular sangeh iasiat bad ki kynhun kaikhlaw.
Ula pynkynmaw ia ka jingpyrshang jong u Dr Lapang ban kyntiew kyrdan ia ka Ri-Bhoi bad ka Baghmara kum ka District, ban pynkha ia ka Meghalaya State Women Commission, bad ban kyntiew ia ka jingshakri ha ka koit ka khiah lyngba ki prokram kum ka Cancer Detection Program bad kiwei kiwei.
Ula ban jur ba ki matti u Dr Lapang kan nang iai bteng ban ai mynsiem ia ki pateng ban wan bad ba ka Jylla kan pyniaid shakhmat ia ki jingiohi jngai jong u, bad ban iatylli da ka jingmut.
U Nongialam ka Liang Pyrshah Dr Mukul Sangma haba pyndon burom khatduh ia une u Nongialam, ula kynmaw ia ka jingshakri ba neh slem bha jong u Dr Lapang ia u paidbah bad ka jingioh jong u ia ki lad ban pynbteng ia ka jingshakri wat hadien bala noh ka met.
U Mukul ula pynpaw ba u ju peit ia u Dr Lapang kum u nonghikai ban shim nuksa hashuwa ba un rung sha ka jylli sain pyrthei. Ula pynkynmaw ia ka jinglong nongialam u Dr Lapang ha ka Congress Legislature Party ha u snem 1988 bad ka jingkut jingmut jong u ban pynbteng ia ka jingshakri ia u paidbah, wat hadien ka rta ba 69 snem.
Une u Nongialam ka Liang Pyrshah ula iaroh ia ka jinglah u Dr Lapang ban aikti bad saindur iala ki jong ki paralok, wat hapdeng ki jingduna ba bun jong ki. U ong ba ka jinglong ba iai shah jong u Dr Lapang, ka jingiai minot, bad jingtrei shitom ki dei ki jinglong ba kongsan kaba pynioh ia u ia ka jingshaniah bad ka jingsngew skhem jong ki paralok ba iatreilang.
U Symbud Myntri Rangbah ba khmih ia ka kam Pohiing (Police) Bah Prestone Tynsong ula ong ba ka Jylla kala duhnoh ia ka nongialam ba radbah da ka jingkhlad noh u Dr Lapang, uba la noh synniang shi katdei eh sha ka roi ka par jong ka Meghalaya.
Napdeng kiba bun ki synniang jong u, u Bah Prestone ula ong ba ia u Dr Lapang yn iai kynmaw kum u nongprat lynti ba hakhmat eh ha kaban seng ia kiba bun ki jaka pule bad ki seng trei mon sngewbha hapoh ka Jylla, kiba la iarap ha ka jingkiew shaphrang bad ka roi ka par ka Meghalaya.
U Symbud Myntri Rangbah ula iathuh khana ia ka jingshem jong u shimet ha ka jingiatreilang bad u Dr Lapang, haba pynkynmaw ia ki jingiasyllok halor ka roi ka par ha baroh ki liang jong ka Jylla. Ula iathuh ba u Dr Lapang ula wan iasoh bad ka National People’s Party (NPP) hadien ba ieh noh ia ka Congress, namar ka jingiohi jngai jong u na ka bynta ka jingkiew shaphrang jong ka Jylla.
U Bah BR Blah, Khun jong u (L) Dr D.D Lapang, ula ai ka burom ia ka jinglong nongialam bad ki matti jong u Kpa haba ban jur ba u Kpa jong u, u ngeit skhem ha ka jingshakri ia kiwei ha ka jaka ban beh ia ka bor. U Bah Blah ula pynkynmaw ia ka jingsdang ka lynti iaid kaba rit jong u Kpa kum u nonghikai bad ka jingkut jingmut jong u sha ka pule ka dangle kum ka lynti ban pynkupbor ia kiwei.
U Bah Blah ula pynkynmaw ia ki kyntien u Kpa, “Ka jingstad ka dei ka sharak ia ka jingdum” kaba kdew ia ka jingkongsan ka jingnang jingstad ban iarap ia kiwei ba kin shem iala ka lynti iaid. Ula pynpaw ba u Kpa jong u, u la kit ia ki jingkyrmen jong ka Meghalaya da ka jingaiei bad ka jingsngewrit, khlem da klet ia la ki tynrai. Kum u Nongai jingmut ba rangbah jong ka Sorkar, u Dr Lapang u la iaibteng ban nang ioh jinghikai bad hikai ruh ia kiwei, haba ai mynsiem ia ki da ka rukom long nongialam jong u.
