Shillong Nailur 05: Ka Khasi Students’ Union (KSU) lyngba ka Education Cell CEC, kala ai khublei kyrpang ia ki nonghikai ha ka sngi kynmaw burom ia ki nonghikai ne ka Teacher’s Day kaba ju rakhe ha ka man la ka 5 tarik u Nailur.
“Ka seng kam lah khlem da kynmaw burom їa ki Nonghikai kiba long ki Khnong bad ki Rijied baskhem ka pule puthi, ka pyrkhat pyrdaiñ ha ka mynta bad ka pateng ban dang wan jong ka jaitbynriew. Haba ngi durїap їa ka lyngkor bakhia ba ki nonghikai ki tynrong, ka pynkynmaw їa ngi ba ki nonghikai ki long shisha ‘ka nuksa babha ban shakri їa ka jaitbynriew khlem da pyrkhat їa ka malade’. Kine ki kyntien ki ngam sha duh ki khleiñ shyieng bad ki thied jabieng jong ngi, phi kup shisha їa ka dur jinglong mynsiem bym khwan myntoi tang їa ka malade, phi da pynkyrpang ha ka kam ban oh-shrong їa ka mut ka pyrkhat ki samla, phi bsa pjiah bad phi їalam lynti sha ka lawei jong ka jingjop” la pynpaw u Chairman Education Cell KSU u Samla Pynkmenlang Sanmiet ha ka kyrwoh khubor.
“Hooid, kaei kaba phi leh ka long palat їa kaei kaba phi dei ban pyndep, kine baroh ki jia namar ka jingkheiñduh bad ka jingaiti lut jong phi їa la ka bor met bor pyrkhat tang ban pynthikna ba ki hep khynnah bad ki samla pule kin їohdiang їa kaba bha tam. Phim shym la hikai tang їa kiei kiei kiba don hapoh ki saw kynroh ka kamra klas, hynrei phi long ki nongsneng nongpyni, ki nongїalam lynti, ki nuksa bad ki nongmuna babha kiba їarap ban king їa ka lieng ha ki lat lat bad ki jingatphyllung ka jingim, phi їarap ruh ban kynjoh kham shajrong ban їa kaei kaba ki samla ki thmu bad ba kin thew ruh shaba kham jngai” la ong ka KSU.
Ula pynpaw ba ha kum kane ka sngi ba ngi kynmaw burom їa ki nonghikai ngi wer їa baroh to ngin pyrto da ka jingsngewnguh їa ka jingaiti lut, bad len lade jong ki na ka bynta ka imlang sahlang, ka jaitbynriew bad baroh ki kam babha ba ki la leh.
“To ngin kynmaw ruh ba ka jinglong nonghikai kam dei tang kum ka kam kamai ja kpoh, hynrei ka dei ka jingkhot ban pyndep їa ki jingїohi bajngai da ka jingaiti lut ban klet noh їa ka malade” la ong u Chairman bad ka bynrap ba ka seng ka buh ka jingduwai ha u Trai Kynrad U Nongbuh Nongthaw ba un nang їai kyrkhu kyrdoh їa baroh ki nonghikai kiba la long ki nongrah prew ban їalam lynti їa ka jaitbynriew ban ngam sha ki Hira ka jingstad bad ba phin nang lah shuh shuh ban їalam lynti їa ka jaitbynriew sha ka lawei ba phyrnai.
 lyngba ka Education Cell CEC, kala ai khublei kyrpang ia ki nonghikai ha ka sngi kynmaw burom ia ki nonghikai ne ka Teacher’s Day kaba ju rakhe ha ka man la ka 5 tarik u Nailur.){kind=link}