Shillong Nailar 30: Ka MDC jong ka Nongshken Constituency ka Kong Grace Mary Kharpuri hynne ka sngi, kala ai da trok kit niut iaka shnong Mawlynnong ba kan lah ban lum ban lang ia ki niut ki nier hapoh ka shnong ka thaw.
Ia kane ka trok kit niut kaba shongdor T.23 Lak tam, la ai lyngba ka Fifteen Finance Commission jongka Tied Grant 2020-21,. Ka Kong Grace kala aiti ia kane ka kali sha ka Dorbar Shnong Mawlynnong khnang ba kan lah ban kit ia u niut naka shnong ban leit bret sha Marten, Mawiong.
Ka Kong Grace kala ong, ba ka shnong Mawlynnong ka dei kaba la pawnam kum ka jaka kaba khuid ba suba, ha kaba ki nongjngohkai na kylleng ki jaka bad ki Ri ki wankai sha kane ka shnong.
Kala ong, baroh shi katta ka shnong kala shu wai iaka kali ban leit bret ia u niut sha Marten kumta mynta da ka jingioh ia kane ka trok kit niut kan iarap bad pynsuk shibun ia ka shnong ban lum ia ki niut na ki iing briew bad na ka jaka jngohkai ban leit bret sha Marten.
Ka Kong Grace kaba dei ruh ka Executive Member kaba khmih ia ki ïew ki hat, kala aiti ia katei ka trok kit niut ha u Rangbah Shnong ka Mawlynnong u Bah Thomlin Khongthohrem, u nongialam ka NPP East Khasi Hills u Bah Aibor Tynsong, ha kaba la iadonlang ki nongkitkam shnong, ki nongshong shnong bad kiwei kiwei.
