Shillong, Risaw 26 : Ka Meghalaya College Teachers Association (MCTA) bad ka NEHU Teachers Association (NEHUTA), ki la ai ka jingmynjur ban iatreilang noh bad ka North Eastern Hill University (NEHU) ha kaban pyntreikam ia ka New Education Policy (NEP) 2020 naduh mynta u snem 2023-2024.
Kane ka rai kala mih na ka jingialang ba kyrkieh jong ka Academic Council ka NEHU kaba long hynne ka sngi Palei ha NEHU.
Lah ban kdew ba ka MCTA kala pyrshah jur ia ka rai jong ka NEHU ban pyntreikam ia ka NEP 2020 na ka bynta ki Four Year Undergraduate Programme (FYUP). Ka MCTA kala boycott ban shim klas ia ki khynnah 1st semester, kaba la iaid palat lai bnai kum ka dak ban pyrshah ia kane ka sienjam jong ka NEHU.
Haba pynbna ia kane ka rai, u President ka NEHUTA Prof Lakhon Kma ula pyntip ba baroh ki Nonghikai College jong ka seng MCTA bad ka NEHUTA ruh kumjuh, kila pdiang mynta ban pyntreikam noh ia ka NEP naduh mynta u snem 2023-2024.
Ula pyntip ba kane ka jingmynjur kala mih hadien ba u Vice Chancellor ka NEHU ula kubur ba ula iaid lait ia ka Academic Council bad shim rai marwei ban pyntreikam ia ka NEP naduh ka 1 tarik Nailar 2023.
“U Vice Chancellor ula kubur ba ka Academic Council ka dei ka bor ba hakhlieh duh ban shim rai haba iadei bad ki policy na ka bynta ka pule ka puthi bad ka bha ka miat ki samla pule” ula ong.
U Prof Lakhon u pyntip ba ka Academic Council jong ka NEHU kan sa shong jingialang biang ha ka 31 tarik mynta u bnai ban iapyrkhat halor kumno ban pyniaid shakhmat ia ka NEP bad ruh ban iakren halor ki syllabus bad ki eksamin jong ki samla pule kat kum kane ka Policy ba thymmai.
