Shillong, Lber 01: Ka Hynniewtrep Youth Concil (HYC) Sohiong Zone hynne ka sngi Thohdieng, kala ai jingmut ia ka Sorkar Jylla ban buh da u Toll Free Number ha ki jaka sumar, ban ailad ia ki paidbah ban ujor, sha ki bor sorkar haba ki shah leh tohmet ha ka por ba ki leit phah sumar.
Ka HYC Sohiong Zone kala pynsngew ia katei ka jingai jingmut ha ka Myntri ka tnat ka koit ka khiah ka Kong Ampareen Lyngdoh bad kila pynpaw ruh ia ki jingeh kaba ki paidbah ki kynduh hapoh ka Sohiong CHC.
U President ka HYC Sohiong u Bah Purningstar Shabong ula ong, ba ka seng na ka por shaka por kala ioh pdiang ki jingujor na ki paidbah, halor ka jingduna ki nongtrei hapoh ka CHC bad kane kala buh jingeh ia ki paidbah ban ioh ia ka jingsumar kaba biang.
Ula kynnoh ba ka Sohiong CHC ka don tang iwei i Doctor bad ka duna ki nongtrei bad kane ka buh jingeh ia ki paidbah ban ioh ki lad jingsumar katkum ka kyrdan jong ka CHC.
“Ngi burom ia ki Doctor bad nongtrei ka tnat ka koit ka khiah, hynrei ngi la ioh jingujor naki paidbah ba ki Doctor bad ki nongtrei ka CHC ki ju kren tohmet iaki paidbah kiba wan shah sumar bad dei namar kane, ka HYC kala ai jingmut ia ka Myntri Sorkar ban buh da u Toll Free Number ban ailad ia ki paidbah ban ujor sha ki bor sorkar lada ki shah kren ne leh tohmet ha ki Doctor bad Nongtrei ki jaka sumar” ong u Bah Purningstar.
Nalor kane, ula pyntip, ba ka seng kala kyntu ia ka Kong Ampareen ban tuklar halor ka jingduna ki Doctor bad Nongtrei hapoh ka Sohiong CHC bad ka seng kala ioh ka jingkular ba hadien ba ka Jylla kala biang ki Doctor, ka tnad kan sa phah Doctor sha katei ka CHC.
 Sohiong Zone hynne ka sngi Thohdieng, kala ai jingmut ia ka Sorkar Jylla ban buh da u Toll Free Number ha ki jaka sumar, ban ailad ia ki paidbah ban ujor, sha ki bor sorkar haba ki shah leh tohmet ha ka por ba ki leit phah sumar.){kind=link}