SHILLONG, Risaw 16: U Prof. (Dr.) Nalin Mehta, Director ka NEIGRIHMS, hynne ka sngi Balang ula plie ia ka Hyperthermic Intraperitoneal Chemotherapy (HIPEC) Machine na ka bynta ban ai jingsumar ia ki nongpang hapoh katei ka hospital.
U Dr Caleb Harris uba long u Surgical Oncologist, ula batai ia ka rukom treikam jongka HIPEC ha kaba la pyndonkam ha kaban pynrung ia ki dawai kiba la pynkhluid ha ka kpoh na ka bynta ban ai iaka jingsumar bad ka HIPEC kadei kaba ai jingmyntoi bha na ka bynta ka jingsumar kaba paka ha ka chemotherapy.
Kadei ka jingsumar kaba la leh tang shisien hapoh ka kamra sumar, ha ka jaka ban leh bunsien ia ka jingai jingsumar kiba iaid haduh katto katne taiew bad 90% na u dawai u don hapoh kpoh bad kumta ka pynduna ia ka jingktah jong ka jaboh na ka Chemotherapy ha ka met baroh kawei.
Kane ka lad kadei ka jingkyrmen ia ki nongpang kiba don ia ka jingpang Cancer, ia kaba ka jingsumar ka long tang ban pynjem ia ka jingpang.
Katba u Dr. Daniala C, Medical Superintendent ula ong ba ka NEIGRIHMS ka ialeh ban ai ia ka jingsumar kaba bha tam ia ki nongpang Cancer ha ka thain shatei lammihngi.
U Director ka NEIGRIHMS u Prof. (Dr.) Nalin Mehta ula ong ba ka NEIGRIHMS kala kiew shakhmat na ka bynta ban ai ia ka jingsumar kaba paka ia ki nongpang Cancer kaba ki paidbah ka thain kin ioh ia ka lad ban shah sumar, kiba ju leit sha kiwei pat ki jylla jong ka ri ban phah sumar ia ka jingpang Cancer.
Ia ka HIPEC la lah ban pyntreikam pura da ka NEIGRIHMS kham mynshwa bad mynta haba kane ka hospital kala ioh ia ki tiar ki tar kiba paka khnang ba kan ai jingmyntoi ia bun ngut ki nongpang.
