Shillong, Rymphang 28: Ka jingwanpoi ki nongthep Vote haka ilekshon MLA 2023 ha Meghalaya kala kot shaka 85.25% ha ki 59 tylli ki konstitwensi.
Lah ban kdew ba haka 5 baje janmiet jong ka 27 tarik Rymphang naka liang u Chief Electoral Officer (CEO) u bah F.R Kharkongor ula pyntip ba ka jingwan poi ki nongthep Vote kala poi 74.32% watla ki dang don katto katne ki konstitwensi kiba dang bteng ka jingthep wat hadien ka 10 baje mynmiet.
U bah Kharkongor ula pyntip ba hadien bala lum jingkhien, la ioh ba ka jingpoi ki nongthep Vote ha ki 59 tylli ki konstitwensi kala kiew haduh 85.25% naka 74.32% kaba la lum tang haduh ka por 5 baje janmiet jong ka 27 tarik Rymphang.
Ula bynrap ba iaka jingkhien bala kot haduh 85.25% la lum khlem da kynthup lang iaki Postal Ballots bad kane ka jingwanpoi ki nongthep Vote kan dang kiew lada khlem shah pynsangeh iaka jingthep Vote ha Sohiong konstitwensi.
“Lada ka jingthep Vote ha Sohiong konstitwensi ka iaid beit, ka jingwan poi ki nongthep Vote ha baroh 60 tylli ki konstitwensi ruh ka lah ban tam 86% namar baroh ki tip ba ka Sohiong kadei ka konstitwensi kaba khring bha iaki paidbah shaka jingthep Vote” la ong u bah Kharkongor.
Lah ban kdew baha ilekshon MLA 2018, ka jingpoi ki nongthep Vote ha baroh 60 tyll ki konstitwensi jong ka jylla Meghalaya ka poi haduh 86.9%
