Shillong, Risaw 12 : Kawei ka Nongtrei Anganwadi na Umthli A, Laitlyngkot, East Khasi Hills, Kong Bariphylla Nongsteng, ka la ioh ia ka khusnam ryngkat ka citation na ka Myntri ka Ministry of Women & Child Development Smriti Irani, halor ka jingtrei shitom jong ka ban iakhun ia ka jingpang Severe Acute Malnourished (SAM) ki Khunlung hapoh ka Shnong Umthli.
Kane ka nongtrei Anganwadi kala ioh pdiang ia kane ka khusnam ha ka 10 tarik Risaw na ka Myntri ka Sorkar Pdeng.
Ia kane la pyntip da u Myntri ka Tnad Social Welfare ka Jylla Bah Paul Lyngdoh ha ka sngi Palei haba pyntip ba ka kong Bariphylla kala trei kum ka nongtrei Anganwadi la 7 snem hapoh ka Umthli A Anganwadi Centre.
Ha ka jingleit jngoh ia ki Longkmie ba ioh khun rit, ka kong Bariphylla kala shem ba iwei I Khun kynthei (1 snem 1 bnai ) ba kha synrap jong ka kong B Nongsteng ila don ha ka jingbym khlain na ka jingduna ka bam tei met (SAM) bad khia tang 5 kilo jrong tang 63 cm kat haduh u Lber 2023 katba I khun synrap shynrang pat I don hapdeng ka met kaba koit ba khlain.
Hadien kane ka jingshem, ki Medical Officer, CDPO, LS, ANM, Anganwadi bad ASHA kila leit jngoh bunsien ia ine I Khunlung naduh u Lber 2023 bad ai jingiasyllok ruh ban kit noh ia ine I Khynnah sha NRC ha Shillong. Ki Kmie Kpa haba nyngkong kila pyneh ban leit wad jingsumar bad ban pynthiah ia ine I Khunlung ha NRC da kaba kam ba I Khunlung I dei iba shait ba khlain.
Da ka jingiatreilang kynthup u MLA, ka DC, MCH Officer, DPO, CDPS bad POSHAN Consultant lem bad u Rangbah Shnong ban leit iakren, ki Kmie Kpa haba khatduh kila rah ia I Khun ban ai jingsumar ha NRC ha ka 17 tarik Iaiong haduh ka 4 tarik Jymmang, 2023.
Ia ine I Khunlung la sumar kum i SAM, jingtlot bormet bad jingduna ka jingsan. Hadien kane, I kong Bariphylla ila leit ban buddien ia ine I Khunlung bad ha ryngkat u Rangbah Shnong, ki ju pynkynmaw ia u Kpa ban sumar bha bad leit phah check up ia ine I Khunlung na ka por sha ka por.
Ine I Khunlung ila nang khlain mynta bad ka jingkhia jong I kat haduh u Nailur 2023 kala kot sha ka 6.9 kilo bad ka jingjrong kala kot 72 cm. Ine I Khunlung mynta ila lah ban shong hi dalade khlem kano kano ka jingiarap bad ila sdang ruh ban par.
