Shillong, Naiwieng 09: U Myntri Rangbah ka Jylla u Conrad K. Sangma ula iaroh ia u nongialehkai Cricket ka Jylla u Akash Choudhary halor ka jingthaw ia ka histori ha kaban tied 6 tylli ki ‘Six’ na ki hynriew bol ha ka shi Over jong ka Ranji Trophy Plate Group pyrshah ia ka Arunachal Pradesh.
Kane ka record ka dei kaba iaryngkat bad ka rekod jong ki nongialehaki cricket kiba pawnam kum u Gary Sobers bad u Ravi Shastri.
Haba ai khublei ha ka rynsan social media, u Conrad ula pynpaw ia ka jingsngewsarong halor kane ka jinglah jong u Choudhary bad ula iaroh ruh ia ka rukom tied ka jongu da kaba kamai 50 run tang na ki 14 bol.
“Nga ai khublei ia u Akash Choudhary halor ka jingioh ia katei ka rekod ha ka pyrthei, da kaba tied 6 tylli ki ‘Six’ ha ka shi Over ha ka First Class Cricket, da kaba iaryngkat bad ki khlur ialehkai Cricket ba pawnam kum u Gary Sobers bad Ravi Shastri. Ula ioh ia kane ka rekod ha ka pyrthei ha ka jingialehkai ha ka Ranji Trophy Plate Group kaba la iakhiad bad ka Arunachal Pradesh. Ula kamai ruh 50 run da kaba tied tang 14 bol ha katei ka juh hi ka jingialehkai. Ka jingtied bha ka jong phi kala pynsngewsarong ia ka Meghalaya. Nga kitbok ia phi ba phin jam shaphrang bad ban seisoh ha ka jingialehkai cricket ka jong phi” la pynpaw u Myntri Rangbah.
Haba niew ia kane ka jinglah lehkai bha kum ka jingsarong ia ka jylla, u Conrad ula ong ba kane ka pyni ba ka jylla Meghalaya kala nang kiew ha ka jingdon ki nongialehkai ba don ka sap bad kan long ruh kum ka jingai mynsiem ia ki nongialehkai cricket ha kylleng ka jylla.
Katba u President ka Meghalaya Cricket Association (MCA) u Nababrata Bhattacharjee ula phah ia ka jingai khublei ia u Choudhary bad pynpaw ba kane ka jinglehkai bha une u ‘All Rounder’ kala wanrah ia ka jingsngew sarong kaba khraw ia baroh ki nongialehkai bad kiba don bynta ha ka jingialehkai cricket ha ka jylla.
