Shillong, Nailur 04 : Ka Myntri Sorkar Dr Ampareen Lyngdoh ha ka sngi Palei, kala ai jingiaroh ia ka hukum bala pynmih da ka Iingkashari Meghalaya High Court ba pyllait noh ia ka na ki jingkynnoh leh bym hok ha ka kam thungkam Assistant Teacher ki skul Lower Primary bala iaid mukotduma la 17 snem.
Ka Dr Ampareen, kaba dei ka Myntri barim ka tnad Pule Puthi, ha ryngkat bad arngut ki Ophisar, kila shah kynnoh ba ki pynkylla ia ki score sheet ban iarap ia ki katto katne ki kyrtong ha ka jingthied iaki Assistant Teacher ki skul Lower Primary ka Sorkar.
Haba kren sha ki lad pathai khubor hadien ba mih ka hukum ka Iingkashari, ka Dr Ampareen kala pynpaw ia ka jingsngew laitluid bad jingsngewnguh da kaba ong “Bun bah ka um hakhrum jong ka Jingkieng. Nga la shah ktahjur bha ha kine ki 17 snem bala leit”.
“Mynta nga kynmaw ia i Mei bala khlad noh, Nga ong ia I Mei ba nga khlem leh hynrei ila shah pynbor khlem sangeh, im don shuh hangne ban lehkmen ia kane ka sngi ba sngewtynnad. Nga kynmaw ia u hynrei bala khlad noh Bah RG Lyngdoh, uba wat hapdeng kiei kiei, u ju iai ong ia nga ba lada phim shym la leh, phi dei ban iai bteng ban shakri ia u paidbah”.
Ka Dr Ampareen kala ai khublei ia ki bahaiing hasem, ki nongkyrshan, ka kynhun ki nongiasaid ain, kynthup u Senior Advocate Salman Khurshid, kiba la ieng ha syndah jong ka ha baroh kine ki jingjia.
“Ka hukum ba mynta ka sngi ka pynskhem ia ka nongrim jong ngi. Ka kyrteng u Bah Peter Garneete Marbaniang kam shym la shah pynjah burom ha kano kano ka rukom. Ngi dei ka Longiing ba bat ia ka jingleh hok bad ka jingshakri kat kaba lah ia u paidbah ka Jylla” ong ka Dr Ampareen.
Ka Myntri kala pynpaw ia ka jingsngewnguh ia ka rukom treikam ki Iingkashari bad ong “Kane ka Ri kan iai iakhun beit na ka bynta ka hok bad kane ka dei ka hok ba nga ioh mynta ka sngi”.
Kala ai khublei ruh ia ki nongkyrshan namar ka jingngeit ha ka bad ban jied biang ia ka kum ka MLA wat hapdeng ki jing kynnoh. Ka Dr Ampareen kala pynpaw ba kan sa duwai lem na ka bynta kito kiba kynnoh bym dei pyrshah ia ka bad ong “U Blei yn ai ha nga ia ka jingaiei ban map ia iwei pa iwei na phi”.
“Nga ai khublei ia u Blei bad ia ka Balang Catholic lem bad ki Lyngdoh Niam kiba iai bteng ban duwai lem na ka bynta jong nga.” Kala bynrap.
