Nongpoh, Lber 06 : U MLA ka Nongpoh Bah Mayralborn Syiem hynne ka sngi, ula pynnoh ia ka song jingiarap da ka pisa sha ka Dorbar Shnong Mawroh, Nongpoh, ba kan thied ia ka kali kit niut ban wanrah ia ka jingkhuid jingsuba hapoh ka Shnong.
Une u MLA ula aiti da ka cheque ba T. 2 lak sha ki Nongialam Shnong ka Mawroh ha ka jingiadonlang u MDC ka Nongpoh, bah Balajied Ranee, Rangbah Shnong Mawroh bah Opel Lyngdoh, ki dkhot jong ka committee Shnong, Seng Longkmie lem bad ki khun Samla jong ka Shnong.
Haba ai jingkren, u MLA u la pynpaw iaka jingiaroh iaka dorbar Shnong Mawroh kaba la shim khia iaka khuid ka suba kum kawei naki mat kiba kongsan eh hapoh ka Shnong.
U la ong ruh, ka jingleh khuid leh suba ka long kawei naki kam kiba kum ki nongshong Shnong ki dei ban pynmlien. U la ong ruh, ka jingleh khuid barabor kadei ban sdang shwa na la ïing hynrei ym dei pat ban klet ban pynkhuid ruh ïaka Shnong ka thaw.
