Shillong, Nohprah 18: U MLA ka South Shillong Constituency u Bah Sanbor Shullai hynne ka sngi Balang, ula sam jingiarap ia ki longiing baduk hapoh ka Constituency ba kin ioh ban rakhe ia ka Khristmas da ka jingkmen bad jingsngewbha ha ki iing ki sem ki jongki.
U Bah Sanbor ula sam ia ki jingai jingiarap na ka MLA Skhim lyngba ka Discretionary Grant ha kaba la mang T.7 Lak sha ki 170 tylli tam ki longiing baduk.
Ha kane ka sngi u MLA ula sam mar T.2000 ia ki longiing ba kin ioh thied cake Khristmas bad la ai ruh ia ki da u khaw, ka umphniang bam bad kiwei kiwei ki marbam.
U Bah Sanbor ula ong ba kine ki longiing kiba la ioh jingiarap kidei kiba la jied da ki 7 tylli ki Dorbar Shnong ia ki longiing kiba duk kiba don ha ki shnong.
Ula kitbok ia ki paidbah ban ioh ia ka Khristmas kaba suk bad kaba kmen bad ban buh jingduwai mar kylliang na ka bynta kiba duk ba suk, kiba pule bad kiba pang ba shitom bad ban kiew shaphrang ha ka jingim.
Nalor kane ula kyntu ruh ia kine ki longiing kiba duk ba lada ki mad ia kino kino ki jingeh, kin wan sha u bad u long uba kloi ban iarap ia ki.
