Shillong, Nailur 11: Na ka bynta ban lah ban trei khambha bad janai ha ka por ba wan lynshop ki bor mariang hapoh ka ri India bad ha ka jylla Meghalaya bad da ka jingthmu ban pynduna iaka jingduh ia ki jingim briew bad ia ki jingdon jingem da kaba pynkhlain ia ka Disaster Response Mechanism, ka National Institute of Disaster Management (NIDM), Ministry of Home Affairs ryngkat ka jingiatreilang bad ka Meghalaya State Disaster Management Authority (MSDMA) bad Meghalaya Administrative Training Institute (MATI) kila pynlong iaka Training Programme kaba 4 sngi halor ka Incident Response System (IRS): Basic & Intermediate ha MATI, Shillong.
Ha katei ka training la wan ban iashimbynta da ki nongmihkhmat na ki District Disaster Management Authorities, ki ophisar jong ki tnad sorkar, ki nongmihkhmat na ka Meghalaya Police bad kiwei kiwei.
Ka Secretary jongka tnad Revenue and Disaster Management bad ka Executive Director, State Disaster Management Authority, ka Kong Matsiewdor War Nongbri, haba ai jingkren kala ong watla ka ri India kala lah ban pyniaid beit ia ki kam ki jam ha ka por ba don ki lanot ha ki snem kiba la leit, hynrei kila don pat ki jingduna bad ki jingdkoh ia kaba donkam ban shimkhia bha hynrei ka rukom ai jingiarap mynta ka long kaba biang bha kaba sted bad kaba la pynkhreh bha lypa.
Kala ong ba ka sorkar pdeng ka thrang ban pynthikna ba shimkhia ia kitei ki jingduna da kaba wanrah iaka Disaster Management Act, 2005. Kane ka aiñ kala wanrah ia ka jingkylla ha kaba iadei bad ka jingai jingiarap bad jingiada haba jia ki jingwan lynshop ka bor mariang.
Kala ong, ba la lah ban long kiba la pynkhreh ban ai jingiada ia kino kino ki jingja, ban pynduna bad ban pynkhreh lypa ia ki sienjam ha kaban pyniaid ia ki kam ki jam.
Ka Kong Nongbri kala ong ba ha ka jingwan lynshop ka khlam COVID-19, ka jylla kala mad iaki jingduna khamtam ha kaba iadei bad ka jingkhein jingdiah namar ba ka jingpynbit pynbiang ka dei kaba la shu pynkhreh hak-dak khlem ka don kano kano ka jingai jinghikai, ka jingdkoh ha ka rukom ‘Plan’ ban pyniaid shakhmat ia ka kam bad ka jingbymshai ha ka rukom don ia kiban khlieh ban pyniaid bad ban bynshet lypa ia ki kamram ha ka Response Team.
Kala ong, ba ka long kaba donkam kyrkieh ban don iaka Response System kaba thikna bad kaba la pynkhreh bha bad ban bynshet lypa ia ki kamram ha man la ki dkhot jongka response team, ka rukom treikam kaba pura bad kaba iaid ryntih bad kaban don ia ki khliehduh kin ai ia ki jingbthah bad ban pyniaid ia ka kam.
Ka Kong Nongbri kala ong, ba ka Response System ka long kaba kongsan bha namar ba ka ioh ban trei ne leh mardor ia kano kano ka jingjia bad ban buh ruh ha ka kyrdan kaba skhem ban pynthikna ba kan ym iarap tang ialade hynrei ban iaraplang iakiwei ruh.
Kala pynpaw iaka jingkyrmen ba lyngba katei ka training programme kana ai jingmyntoi ia baroh ki nongiashimbynta khnang ba kin lah ban leh da ki kam ha ka por ba donkam bad kala kyntu ia ki nongiashimbynta ba kin ai iaki jingai jingmut bad ia ki jingtip, khnang ba yn lah ban lah ban pynrung ha ka Disaster Management Plan jong ka jylla.
U Shekhar Chaturvedi, Asstt. Professor, Division of Disaster Response & Recovery, NIDM, Delhi, ula ai jinghikai kyrpang ha katei ka training programme ha kaba iadei bad ki lad ki lynti ban shim haba wan lynshop ki bor mariang ha kaba la ai jingkyrshan ia u da u Arun Verma jongka Centre of Mass Congregation & Transport related Disasters, Division of Disaster Response & Recovery, NIDM, Delhi.
