Shillong, Risaw 03 : Ka Iingkashari Meghalaya High Court kala ai bah jamin ia kawei ka Kynthei kaba shah pynngat ha ka kyndon Narcotics Drugs and Psychotropic Substances Act (NDPS Act) namar ba ka don ia ka jingpang Human Immunodeficiency Virus (HIV).
Ia kane ka hukum la pynmih da u Justice W Diengdoh haba shong bishar ia ka jingkyrpad. Ula ong ruh ba dei ban niew kyrpang ia kum kane ka kam khang ba kane ka nongpang HIV kan ioh ia ka jingsumar.
“Ka nongpan bah jamin ka dei kaba pang HIV khlem da khein ia ka jingai jingsumar jong ka Sorkar ka lah ban biang ne em kat kum kane ka jingpang, kane ka Iingkashari ka sngew ba dei ban khein kyrpang ia kane ka briew ba kan ioh ia ka jingsumar ia ka jingpang ba ka don ha ki jaka ba ka sngew iahap” ong u Judge.
Haba pynmih ia ka hukum, ka Iingkashari kala phaidien ruh ba ha u snem 1991, ka Iingkashari Supreme Court kala ai jamin ia uwei u briew, uba don ia ka jingpang HIV.
Ia kane ka kynthei kaba la ioh jamin, kala shah pynngat halor ka jingkynnoh ba ka don ha ka met jong ka, ia bun u drok ba mut pyniaid iew.
Ka Iingkashari kala ong, ia ka bah jamin lah ban ai hapoh ka kyndon 37 jong ka NDPS Act haba kdew ruh ia ka Article 21 jong ka Riti Synshar ka Ri kaba kren ia ka jingim bad jinglaitluid jong u briew ruh ka dei kaba kongsan.
Ia kane ka briew la pyllait bah jamin hadien ka jingai ia ka surety ba T. 1 lak.
