Shillong, Nailar 11: Ki nongshong dukan ha ka thain Umdiengpun, Upper Shillong, kaba hap hapoh ka jaka jong ka tnat Forest, hynne ka sngi Thohdien, kila kyrpad ia u Principal Chief Conservator of Forest & HOFF R.S Gill ban ai jaka lem iaki longkmie ban buh dukan hakhmat jong ka Park kaba sorkar ka thmu ban tei ha kane ka jaka.
Kine ki nong shong dukan haka jingsynrang lang ka United Hynniewtrep Movement (UHM) kila kynduh ia u Principal Chief Conservator of Forest & HOFF bad kila ai ruh daka dorkhas hadien baka tnat Forest kala pynmih daka hukum iaki briew kiba shong dukan ha Umdiengpun ba ki dei ban pynpra noh ia ka dukan jong ki shwa ka 31 tarik u Nailar.
Haba kren sha ki lad pathai khubor u President ka UHM bah Charlie Rani ula ong ba kat kum ka jingiathuh u PCCF, ka tnat Forest kala pynmih iaka hukum ban beh noh iaki ba shong dukan ha katei ka jaka namar ba ka sorkar ka don jingthmu ban tei daka Park ha Umdiengpun.
U bah Charlie ula ong ba ka seng kam don kano kano ka jingpyrshah ia ka jing thmu jong ka sorkar ne ka tnat Forest hynrei ka sorkar kadei ruh ban pyrkhat lem ia kine ki longkmie kiba shong dukan la slem ha kane ka jaka.
U bah Charlie ula ong ba lada ka tnat Forest ka lah ban ai jaka ia kiwei ki jaidbynriew ban tei Temple ha Mahadev Khola, balei kane ka juh ka tnat kam lah ban ai jaka iaki trai ri trai muluk ban ioh kamai kajih ban pyndap iaka ïing ka sem.
Haba kylli u bah Charlie ula iathuh ba naka liang u PCCF ka tnat Forest um pat lah ban kular eiei halor kane ka kam namar kan dang ban ia shong pyrkhat shwa bad ka sorkar rynkat ka tnat Forest.
