Shillong, Rymphang 24: “Ai ILP ia ngi, ngin kyrshan ia ka BJP”-ong ka placard bala rah da ki dkhot ka seng Hynniewtrep Youth Council (HYC) ha ka rally ialep elekshon jong u Myntri Rangbah Duh ka Ri Narendra Modi, kaba long hynne ka sngi thohdieng ha Khyndailad, Shillong.
U Narendra Modi ha ka sien ba nyngkong eh ula iashimbynta ha ka roadshow ha Meghalaya bad ai jingkren sha ki paidbah ha Khyndailad, ban pan jingkyrshan na ka bynta ka BJP ha kane ka elekshon MLA ban long la 27 tarik Rymphang.
Kine ki Dkhot ka HYC kila rah ruh ia ki placard ba pynpaw ia ka jingdonkam ban pynrung noh ia ka Ktien Khasi bad Garo ha ka khyrnit ba phra jong ka Riti Synshar ka Ri India.
U President ka HYC Robertjune Kharjahrin ula ong ba lyngba kine ki placard, ka HYC ka shu pynkynmaw ia ka Sorkar Pdeng bad ia u Myntri Rangbah Duh halor ka jingdonkam ban shim ia ka rai halor kine ki mat ba donkam bad ba shonghok da kaba burom lang ia ka resolution bala mynjur da ka Iingdorbar Thaw Ain ka Jylla.
Haba iai ban ia ka khubor ha ki placard, u Kharjahrin ula ong ‘Lada ki ai ILP bad kynthup lang noh ia kine ki artylli ki Ktien ha ka khyrnit ba phra, ym tang ma ngi hynrei kiba bun kin kyrshan ia ka BJP”.
Haba kylli ia ka jingbym lah jong ka BJP ban kynthup ia ka ILP ha ka manifesto, une u Nongialam ka HYC uloa ong “Ka shong ha ka BJP ban shim ia ka rai”.
Ula ong ba ki mih ki sur bapher bapher na ka BJP halor kane ka mat ha kaba ki Nongialam na Delhi ki ong da kumwei bad ki Nongialam nangne pat ki ong da kumwei, kaba pyni ba kane ka party kam shimkhia satia ia kane ka kam.
