Shillong, Nailur 25: Ka Khasi Students Union (KSU) ha ka sngi Balang kala aiti ia ka dorkhas ba 6 tylli ki mat sha u Lat ka Jylla CH Vijayashankar, ba kyntu ba un tuklar lem ha kaban pyntreikam noh ia ka Inner Line Permit (ILP), ban pyndam ia ka Citizenshop Amendment Act (CAA), ban pynrung ia ka ktien Khasi ha ka 8th Schedule, ban pyllait noh ia ka Indo-Nepal Friendship Treaty, 1950, ban pynbeit noh ia ka jingiakajia pud bad ban seng ia ka Central Agricultural University ba shirta ha Jylla.
U General Secretary ka KSU Donald V Thabah ula batai ha ka dorkhas ia ki sienjam bala shim da ka KSU ban kyrpad ia ka Sorkar Pdeng halor ka jingdonkam ban pyntreikam noh ia ka ILP ha Meghalaya. Hynrei, haduh mynta ka KSU bad ki paidbah kin dang ban ioh ia ka jubab kaba sngewtynnad na ka Sorkar Pdeng.
“Kumta, ngi kyrpad rit ia phi ban sngewbha shimkhia lem ban lah pyntreikam noh mar dor ia ka ILP ha ka Jylla Meghalaya lyngba ka jingtuklar jong phi ban iakren bad ka Sorkar Pdeng” ula ong.
Kat kum ka jingong jong u, ka Jylla Meghalaya kala kylla suki suki kum ka Tripura bad Assam ha kaba ki jaidbynriew riewlum trai jylla kila jan kylla rit paid na ka jingwan ki briew ba nabar.
Haba dawa ban pyndam noh ia ka CAA, 2019,naba ka plie lynti ban khein nongshongshnong ia baroh ki briew ba wan na ki ri ba marjan, u samla Donald ula ong ba kane kan sa don ka jingktah kaba jur ia ka jingdon paid ki jaidbynriew trai jylla hapoh ka Jylla.
Une u Nongialam ka KSU ula kyrpad ruh ia u Lat ka Jylla ban iakren lem bad ka Sorkar Pdeng ban pyllait noh ia ka Meghalaya na ka jingtreikam jong ka Indo-Nepal Friendship Treaty, 1950.
“Kumba long ka CAA, ka India-Nepal Friendship Treaty 1950, kaba ailad ia ki nong Nepal ban ioh long nongshongshnong ka India khlem kino kino ki kyndon, kala ktah jur hangne ha Jylla Meghalaya. Naduh u snem 1980, ka Meghalaya kala sakhi ia ka jingnang heh paid ki paid Nepali hapoh ka Jylla, kaba buh ha ka jingma ia ki riewlum rit paid jong ka Jylla, kaba lam sha ki jingiakynad hapdeng ki ar kynhun. Ki paid Nepali kila pynkha ruh ia ki jingeh ha ki jaka khappud ka Meghalaya ban tynjuh bor ia ki riewlum trai jylla halor ka hok iala ki jong ki jaka bad ka Jylla” ula ong.
Haba pynpaw iaka jingkwah ban pynbeit noh mardor ia ki jingiakajia pud bad ka Assam, u samla Donald ula ong “Ka KSU namar kata ka pan ia ki jingpyni lynti ia baroh ar ki sorkar ha kaban pynthikna ba ki jaka iakajia kiba hap hapoh u pud u sam jong ki Hima Khasi, dei ban kynthup lang noh hapoh u pud u sam ka Meghalaya”.
Halor ka ktien ka thylliej, une u Nongialam ka KSU ula ong ba ka jingkyrpad ban kynthup noh ia ka ktien Khasi ha ka khyrnit ba phra jong ka Riti Synshar ka dei ka jingdawa kaba shonghok, kaba la dei kren hakhmat ka Sorkar India naduh u snem 1960 da ka Khasi Author Society.
U pyntip ba ka KSU ruh kala buh ia kane ka juh ka jingdawa naduh u snem 1992 ban pynrung noh ia ka ktien Khasi ha ka khyrnit ba phra. Ka Sorkar Meghalaya kala mynjur ia ka Resolution ba kyrpad ban pynrung ia ka ktien Khasi bad Garo ha ka khyrnit ba phra naduh u snem 2018.
Ha kajuh ka por, ka KSU kala kyrpad ia u Lat ban kren bad pynthikna ba ki jingkular bad ki jingtyrwa ban wanrah ia ka Central Agricultural University ha Meghalaya kin urlong shisha.
Ha u 2010, ka Sorkar Pdeng lyngba ka Ministry of Agriculture kala mynjur ban seng ia ka Central Agricultural Univerity ha Jylla Meghalaya ha ka jaka kaba 200 acre ha Kyrdemkulai, Ri-Bhoi District.
U pyntip ba ka KSU ha ka 16 tarik Naitung, 2019 kala thoh sha u Myntri ka Ministry of Agriculture Narendra Singh Tomar halor kane ka kam hynrei haduh mynta ym pat ioh satia ia kano kano ka jubab.
 ha ka sngi Balang kala aiti ia ka dorkhas ba 6 tylli ki mat sha u Lat ka Jylla CH Vijayashankar, ba kyntu ba un tuklar lem ha kaban pyntreikam noh ia ka Inner Line Permit (ILP), ban pyndam ia ka Citizenshop Amendment Act (CAA), ban pynrung ia ka ktien Khasi ha ka 8th Schedule, ban pyllait noh ia ka Indo-Nepal Friendship Treaty, 1950, ban pynbeit noh ia ka jingiakajia pud bad ban seng ia ka Central Agricultural University ba shirta ha Jylla.){kind=link}